Sorkarin a thara Ethics Committee a din  chuan vawiin khan Chief Minister Office Cabinet Roomah Chief Minister Pu Lal Thanhawla hovin meeting an nei.

Meetingah hian Chief Minister chuan Ethics Committee member thar te chu chibai bukin tuna Committee chu a hmasa aia huam zau zawka siam a nih thu  sawiin, rinngam tur sakhaw puithiam leh hruaitu leh tlawmngai pawl atangin sorkarin member te a siam a ni a ti a. RTI Act nen tangkawpin Ethics Committee hian sorkara thil diklo awmte venpui tura beisei an nih thu a sawi a. Tunah chuan 'Terms of Reference' mumal taka siam anih tawh avangin awmze nei taka an kal ngei a tul dawn tih sawiin, tul an tih changah mithiam zawkte purin seminar ang chi te pawh buatsaih thei tura sorkarin a ngaih thu a sawi bawk a ni.

Chief Minister chuan sorkar awmchhan hi mipuite tan anih angin Mizoram mipuite changkanna hi an duh ber anih thu a sawi a. Mipui ten beiseina sang tak Committee ah an neih dawn avangin dik tak leh tha taka Mizoram thatna tura member tin ten theihpatawp chhuah theuh turin a chah nghal a ni.

Meetingah hian member tin ten inthlahrunna awm lovin zau takin an ngaihdante an sawi a. Terms of reference ah chiang taka an hnathawh dan tur a inziak a, chutianga kal chho tur an nih te sawihoin member 10 awm tura tihah mi 9 ruat an la nih thu te, an term chhung tur chu kum 2 anih thu leh thutlukna siam turin alo berah mi 6 tal meetinga an awm angaih thute an sawilang bawk a ni.

Ethics Committee din tharna sorkar Notificationa a lan dan angin Chiarman tur leh Secretary turte hi anmahni atanga inthlang tura tih an ni a. Vawiin meetingah hian  member 7 chauh an kal theih avangin inthlang tur hian June ni 1, 2011 chawhnu dar 2 nise tiin  an remti tlang bawk a ni.      

Attachment

  • Loading attachment...