Nimin khan Pu P.C. Lalthanliana LAD etc. Minister leh Pu K. Lianzuala Bialtu MLA ten Lentlang Block MHIP Conference vawi 1na Chhingchhip Community Hall-ah Khuallian leh khual zahawm niin an hmanpui.

He khawmpuiah hian Khuallian chuan thu sawiin  MHIP-te chu sawrkar tanpuinaa inghat nilo khawtlang hmasawnna tura thawk leh sawrkar pawhin a rinngam pawl zahawm, tangkai leh pawimawh tak an ni tih a sawi a. Chhungkua hi khawvela zirna in tha leh pawimawh ber a ni a, chuta Principal te chu chhungkaw nu - hmeichiate hi in ni a ti.

Minister chuan khawtlang nun tha leh hmasawn nei tur chuan chhungkaw enkawlna tha a pawimawh ber a, chumi nei tur chuan nute an pawimawh ber a ni tiin hman lai huna kan hriat ngai loh fahrah enkawlna in lo pung zel te hian nute pawimawhzia a tilang chiang a ni a ti.

Khuallian chuan hmeichhia-te chu Pathian thil siam phungah pawl ang pawh ni kher lovin mi pawimawh tak an ni sa hrim hrim a. Lei anchhedawnga siamtu leh chumi chhandamna lehna hna thawh kawnga mi pawimawh ber berte pawh hmeichhia tho a ni a ti a, ram leh khawtlang rorelnaah pawh hauhsak bik nih kher ngai lova mahni finna leh felna, taimakna leh inpekna avanga thlan tlak tam tak an awm thu leh chutiang mi nih chu tum zawk turin kal khawmte a chah bawk.

NLUP chungchang pawh sawiin Pu Thanliana chuan Party Policy ringawt ni tawh lovin sawrkar policy a ni tawh a, sawrkarin a ngaih pawimawh em em rethei leh chhumchhiate chhanchhuah hna a thawhna policy tha leh ropui tak hi a hlawhtlin ngei theih nan MHIP te chu thawhpui atan a sawm a, chhungkaw nu ber in nih avangin in pawimawhin in tangkai em em dawn a ni a ti.

He hunah hian khual zahawm Pu K. Lianzuala bialtu MLA pawhin thu sawiin MHIP te chu an pawl thiltum ang ngei a sawrkarin ram hmasawnna tura hna a thawhnaah thawhpui tha tak ni turin a fuih a, MHIP-te chu Mizorama tlawmngai pawl lian ber dawttu in ni a, ram leh khawtlang tana in tih tur leh in tih theih pawh a tam a ni a ti a, pawngsual leh hmeichhiate chunga hleilenna thleng thin tam takah pawh hmeichhiate hian mawh an phur ve nia a hriat thu leh incheina, tawngkam leh khawsakziaah te tih tur leh tih loh tur an nei ve nia a hriat thu a sawi bawk.

Attachment

  • Loading attachment...