Mizoram Board of School Education (MBSE) buatsaih Mizo Tawng hman dan chungchanga inrawnkhawmna chu vawiin chawhma dar 11 khan MBSE Conference Hall ah neih a ni a, School Education Minister Pu Lalsawta’n a hmanpui.

Mizo Tawng chungchanga inrawnkhawmnaa Khuallian Minister Pu Lalsawta chuan Mizo tawng chu hnam min phuarkhawmtu pawimawh tak a ni tiin mahni duh dan ang anga kan hmang mai thin chu tha lova hriain Mizo tawng hman leh ziah dan kalphung mumal zawk leh zavaia pawm tlan theih tur duan a tul thu a tarlang a, chutiang atana inrawnkhawmna chu zau taka pawl hrang hrangte sawma huaihawt a nih thu a sawifiah bawk. Eng tawng pawh hi amah mai chuan a hausa nghal bik lova, khawvela tawng hman tlang lawn ber Sap tawng English pawh hnam dang tawngte sengluta tihhausak chhoh zel a nih thu te a sawi lang bawk. Minister chuan “Tawng chungchangah Kohhran hrang hrang te, Institution leh Pawl hrang hrang te pawhin lungrual taka kan ram tana tawng khat, kan intawm tlan theih, a ziak dan leh lam dan leh seng luh leh phuah belh chungchang thlenga thuneitu (authority) kan buatsaih theih chuan hmasawnna lian tak a tling dawn a ni, a ti bawk.

Inrawnkhawmna hi Rev. Dr. Lalchungnunga, Chairman, MBSE-in a kaihruai a, Pu R.Vanramchhuanga, Coordinator, Mizo Language Committee leh Director (Academic), MBSE ni bawk chuan Inrawnkhawmna huaihawt a nih chhante sawifiahin hun kalta lama Mizo Grammar bu leh Mizo Tawng Ziah Dan lehkhabu chhuah a lo nih tawh dan te a tarlang a, Mizo Language Committee te, Bible Society leh Kohhran hotute chuan insiamrem hreh lova tihdanphung inang tlang tur duan chhuah a pawimawh dante a sawi lang bawk.

Vawiina Mizo Tawng hman leh ziah dan chungchanga inrawnkhawmna ah hian Mizo Language Committee bakah thuziak mi te, tlawmngai pawl leh Kohhran pawl hrang hrang te, MJA leh zirna institution aiawh te sawm an ni a, zau takin sawihona hun hman a ni.