3572/2024-2025

Dated Aizawl, the 28th November, 2024: Vawiin chawhnu dar 1:00 khan Dr. Vanlalthlana, School Education Department leh Higher & Technical Education Department changtu Minister chuan Model Centre on Critical Life Skills and Occupational Skills Development (2024-2025) kharna hun, Directorate of School Education Conference Hall, Treasury Square-a buatsaih chu Khuallian niin a hmanpui a; Training chhuakte hnenah Certificate a hlan nghal bawk a ni.

Khuallian Education Minister chuan trainees hlawhtlingte chu a lawmpui tak zet thu a sawi a. Eizawnna kawng hrang hranga thiam zir hlutzia leh Zirlaite pawhin uar se a duh thu sawiin, Department hnuai atanga zir chhuakte chuan Handholding hnuaiah pawh dinhmun pawimawh tak an luah tur thu a sawi a. Thiamna bik neite chu Mizoramin a mamawh nasat zel dawn thu sawiin, Sawrkar pawhin Occupationaal Skills Development Training chhuakte chu a ngai pawimawh zui zel dawn tih a sawi bawk a ni.

Vawiin hun hman hi Pi Angela Zothanpuii, Director, School Education Department chuan kaihruaiin kalkhawmte lo lawmna thu a sawi a. Pu TC Lalremsiama, Asst. Director (AE) chuan hmalakna kimchang report pein, Training chhuakte hnena certificate semin a zui nghal a. Khatla South Model Centre-a zIrlaite leh Tlangnuam Vengthar Model Centre-a zirlaite hnen atangin thusawi ngaihthlak niin, Pi R. Lalnunthari, Joint Director (E), Directorate of School Education chuan lawmthu sawiin hun hi a khar a ni.

Model Centre hnuaiahte hian Trainer mi 6 awmin, anni hian Trainees mi sawmli (40) te hnenah eizawnna chi hrang hrang Haircutting, Beauty-culture, Tailoring, Plumbing, baking etc. an zirtir a ni.