3573/2024-2025 

Aizawl, 28.11.2024: Vawiin chawhnu khan Excise & Narcotics Minister Pu Lalnghinglova Hmar chuan Foundation for Drug-Free Mizoram High Council 2024, Synod Conference Center, Aizawl a buatsaih chu khuallian niin a hmanpui. 

Minister chuan ruihhlo a Mizoram dinhmun chu tha lo a tih thu sawiin, tha thlah lova pawl tinte intichak tawn a hma lak tlan a pawimawh takzet thu a sawi. Supply Reduction, Demand Reduction leh Harm Reduction lama hmalak tlan a, hmalatu hrang hrang Sorkar, tlawmngai pawl hrang hrang leh Kohhran te an tan tlan a pawimawh thu a sawi a. Mizoram chu ruihhlo kalkawng a awm a nih avangin lut a tam avangin ngawrh zual zawka ven pawhin a tlang chin engemawzat chu a awm thu a sawi a. Hemi a nih avang hian ruihhlo ti lo tura inzirtirna a pawimawh thu a sawi a. A ti mek, dam thei bawk silote pawh ngaihthah chi an nih loh thu a sawi a. Chhanchhuah theih loh tura kan dah chuan thi turin kan indah tihna a nih mai dawn avangin chhanchhuah hna beidawng tur a ni lo, a ti a ni. Excise & Narcotics Department chuan indaihlo sawi lovin a awm chin chin in theihtawp an chhuah mek thu leh an chhuah zel tur thu sawiin, sorkar sum indaihlo karah a rem chin chinah inthuamthat a nih thu te a sawi bawk. 

He Drug-Free Mizoram High Council ah hian Excise & Narcotics Commissioner Pu Z. Lalhmangaiha chu khualzahawm niin nasa zawka ruihhlo do kan tan a ngai a ni tiin Excise Department in hma a lak dan te a sawi a. Awareness campaign nasa zawk a tih a tul thu sawiin, mi rilru hneh a, fihlim tura nasa taka kan beih a ngai a ni a ti. 

Vawiin High Council-ah hian “Mizoram ruihhlo do pawl lungthu pathum - supply reduction, demand reduction leh harm reduction te hi ruihhlo kan dona kawnga thawhho ninrawh se” tih resolution putluh chu member ten an pass a. Member kal ta te hriatrengna hun hman niin, Life Member-te hnenah certificate sem a ni bawk. Drug-Free Mizoram hi kum 2022 khan mumal taka din niin ruihhlo do kawngah kawng hrang hrangin hma an lo la tawh a. An hmalakna in thalai sing hnih chuangin ruihhlo laka fihlim turin an intiam tawh a ni.