DIRECTORATE OF INFORMATION & PUBLIC RELATIONS, Government of Mizoram, India

3574/2024-2025

Dated Serchhip, 28th November, 2024: Vawiin khan Hualtu khua chuan an khaw kum 400 tlin lawmna leh Hualtu Branch YMA Golden Jubilee lawmna, Alu Hmun Field, Hualtungamtawna Runah an buatsaih a. He hunah hian Home Minister Pu K Sapdanga chu khuallian niim, Agriculture Minister Pu PC Vanlalruata, bialtu MLA ni bawk chu khualzahawm a ni.

Hualtu khua kum 400 tlin lawmna Lungphun chu Home Minister chuan a hawng nghal bawk a ni.

Pu K Sapdanga chuan Hualtu khaw kum 400 tlin a lawmpui thu sawiin kum tam tak kalta atanga khaw intodelh lo ni tawh Hualtu khua chu chhuanawm a tihzia a sawi a. Sorkar flagship program Bana Kaih Policy a an ngaih pawimawh ber thlai thar policy tihlawhtlingtu tur khua an ni tiin “Sorkarin thlai thar a thlan chhuah bik Hmarcha leh Sawhthing phei chu in hlawkpui ngei ka beisei” a ti.

Home Minister chuan Bana Kaih Scheme hnuaia an hmalakna sawi zauin tun dinhmunah Hmarcha leitu tur tihfel thawkhat a ni tawh a, thlai dangte pawh sorkar lamin a leitu tur leh a hralhna tur a buaipui mek, a ti a. “Handholding Policy leh CM special package hmangin kuminah bul kan ṭana, kuthnathawktute huan lo ram thleng phak tanpuina in hmih ngei ka beisei a, chu chu kan sorkar pawhin a tum ber a ni", Home Minster Pu K Sapdanga chuan a ti.

Pu K Sapdanga chuan Hualtu khua chu an thlahtu Pu Vaikaia lu nghahna hmun a nih avangin a ngaihlu hle a, inzawmna thuk tak an neih thu a sawi a. Amah leh a chhungte chuan Hualtu khua an ngaihhlutzia leh an lawmpuizia lantir nan kum 70 tling chin te hnenah Shawl a hlan a. Hualtu khaw hmasawnna hnathawhna atan Rural Developement Department atangin cheng nuai 4 leh Local Administration Department atangin cheng nuai 3 pek an nih tur thu a sawi bawk.

Pu PC Vanlalruata, Agriculture Minister pawhin a bial chhunga khaw ropui tak mai leh upa tak mai Hualtu khua chu vawiin thlengin khaw chhuanawm an la ni renga, Zikhlum leh Tomato ah Aizawl khawpui chawm mek tu Hualtu khua chu khaw taima tak lo ni zel turin a chah a ni. Minister chuan Hualtu chu Mizorama mi hmingtha tak tak chher chhuaktu khua an ni, a ti a. Zirna kawngah te, kuthnathawh kawngah te, infiamna kawngah te ṭan la zual sauh sauh turin a fuih a ni.

Home Minister Pu K Sapdanga leh Pu PC Vanlalruata Agriculture Minister te hian Hualtu khua hmasawnna tur mamawh hrang hrangte a hmunah an en bawk.

Attachment