Nimin tlai khan Chaltlang Venga a DIET ramchhungah School Education Minister Pu H. Rohluna chuan Mizoram Board of School Education(MBSE) New Building sakna turin lungphum a phum a. He building sakna tur sum Rs 10 Crore hi New Economic Development Policy(NEDP) atanga ruahman a ni.
MBSE New Building sakna tur Foundation Stone Laying pual hian MBSE Conference Hall-ah inkhawm buatsaih a ni a. He huna khuallian, School Education Minister Pu H. Rohluna chuan Mizoram tihhmasawn nan kawng tinrengah NEDP chu tangkai taka hman a ni a. A bikin Health leh Education sector-ah te phei chuan nasa takin hmasawnna a thlen tawh tih a sawi a. Infrastucture thar te, hmaraw thar, Office bungraw thar te leh hamthatna thar buatsaih te chu a thawktute tih phurna, an theihna tihpunsak tumna leh hmasawnna lian zawk thlen tura sawrkar hmalakna a ni a ti.
School Education Minister Pu H. Rohluna chuan School Education a enkawl chhunga thil inthlak danglam te leh hlawntlinna kawng tam taka a hmuh thu sawiin chungte chu a thawktute inpekna, thawhhona tha leh inlungrual vang a ni tih a sawi a. Mizoram hmasawnna atan Education a pawimawh zia hre reng chunga tan la thar zel turin Education Sector a hnathawk zawk zawngte chu a chah a ni. " Sawrkar chuan Education a kan thil tum zinga pakhat chu naupang tan result tha neih a ni a. Mahse, result tha neih chauh hi kan tum a ni lova. Result tha neih ai pawha kan ngaihpawimawh leh tun kan dinhmun en a kan mamawh em em chu Quality Education a ni. Kan zirlai, kan thalai te kan en hian hnamdang te nena in elturin theihna an nei em tih te, midang te pha turin in eng anga zirtirna thazawk nge pek tur tih rilru sengin Quality Education hi kan goal pawimawh ber a ni", a ti. Naupang tana rilru hahna thlen thei, Board Exam hmaa Selection Test te pawh tih bo a ni thei chu thil lawmawm tak a ni tih a sawi a. Pu H. Rohluna chuanzirlaite chu anmahni kutke an din theihna tura zirtirna pek bakah nungchang mawi zirtirna an dawn te pawh khua leh tui tha an loh nih chhoh theih nan a pawimawh tel bawk a ni a ti.
Thusawitu dang, MYC Chairman Pu Joseph Lalhimpuia chuan MYC hmanga sawrkarin Thalaite Khawvel zauh sak zelin kawngtin rengah hma a la mek a, MYC hmalakna kaltlangin thalai sangtelin eizawnna an hmu tawh tih a sawi a. MYC hmalakna zinga pakhat All India Services, Central Services, Defence Services bakah Premiere Institute - IIT, IIM, etc..a thalaite an inziahtlin theihna turin coaching kalpui mek a ni a ti a. Coaching-ah hian India rama a thaber zinga mi ALS an thawhpui tih sawiin hunreilote chhungin India rama hna sang ber ber Mizo thlalai ten an thawk ve leh thuai a beiseiawm a ni a ti. Pu Mahima chuan Mizo thalaite tan Competition Exam hmachhawn turin a bulthum - High School leh Higher Secondary Syllabus te chu thil pawimawh hmasa a ni a ti a. Competitive student siam turin competitive syllabus a pawimawh a. Hemi kawngah hian MBSE mawhphurhna a sang hle tih sawiin MBSE hotute chuan Mizorama zirlai te Zirlaibu te chu state dangte elpha a ni em? State danga zirlaite nen Competition Exam bei dun dawn se Mizorama zirlaite an rintlak angem tih thlengin ngaihtuahna seng chho zel se a duh tih a sawi a ni.
Foundation Stone Unveiling Ceremony hi MBSE Controlling Authority Pi Esther Lal Ruatkimi, Commissioner & Secretary, School Education chuan a kaihruai a. MBSE aiawh hin MBSE Chaiman Pu F. Lianhmingthanga'n thu a sawi a. Report Pu C. Lalbiakngura, US, MSBE hnen atangin ngaihthlak a ni. Report atanga alan dan chuan MBSE New Building hi chhawng 8 a sang a ni dawna. He buildingah hian Lirthei Ke li nei pangai 30 bawr vel leh Lirthei kehnih nei chi tam tham tak dinna tur, Garage te, Conference Hall mi 150 bawr vel thut lenna te, vawikhata mi 16 phur thei Elevator te, mi 25 thut lenna tur Committee room te leh tuizem liantham tak te siam tel a ni bawk dawn a ni. Ruahman dan chuan MBSE Building thar tur hi a lian lai berah Sq.M 480.72 a zau a ni dawn a ni.
