Tukin khan Mamit Bazarveng Indoor Stadium kawtah faina leh thianghlimna inzirtirna hun neih a ni a. Hemi rual hian Mamit Bazarveng chu khawlaia bawlhhlawh paih lohna veng (Litter Free Zone) a puan a ni a. He hun hi Pu H.D Lalpekmawia, District Urban Development Officer, UD&PA, Mamit chuan khuallian niin a hmanpui.

Khuallian Pu H.D Lalpekmawia chuan Bazarveng chu Mamit khawpui chhunga a hmasa ber tura khawlaia bawlhhlawh paih awm lohna venga puan theih a ni chu lawmawm a tih thu sawiin Bazarveng huamchhunga dawrkai, Restaurant siam leh Bazar-a nitin inzuar thinte pawh a hmun lova bawlhhlawh paihte chu hawihhawm taka  bawlhhlawh paihna kawhhmuhtu ni turin a chah a. UD&PA bultumin khawpui fai inelna Kum 2017 atangin neih tan a ni a. A hmasa bera Mamit khawpuiin 1- na lawmman kan la thei chu khawtlang mipuite thawhrah a ni a. Hun lo awm lehzel turah pawh faina leh thianghlimna kawnga tan la zel turin mipui pungkhawmte a sawm a ni.

Pu C. Ramdinzela, President, MJA pawhin thu sawiin faina leh thianghlimna kawngah hma kan sawn zel a. Khawpui fai leh thianghlim siamtu ni tur leh faina kawnga midangte zirtirtu ni thei turin mitin kan pawimawh a ni a ti. 

He hunah hian Bazarveng huam chhunga khawtlang hruaitute leh tlawmngai pawl hrang hrang aiawhte'n thu sawiin an veng paltlanga kalte'n Bazarveng huamchhung chu khawlaia bawlhhlawh paih lohna veng a ni tih hriatsak a, vawnfaipui turin an ngen a ni.

Mamit Bazarveng hian Children Sanitation Club neiin anni hian hunrei tawh tak ata khawlaia bawlhhlawhte tifaiin hnatlang an nei thin a. He hunah hian Children Sanitation Club-te hak tur UD&PA buatsaihsak T.Shirt semna neih nghal a ni bawk.