DIRECTORATE OF INFORMATION & PUBLIC RELATIONS, Government of Mizoram, India

Vawiin khan Deputy Speaker Pu R. Lalrinawma chuan Zemabawk North Branch YMA Committee Room a hawng.

Deputy Speaker chuan thusawiin Zemabawk North Branch YMA Committee Room hawn theihna tura hma latu te zawng zawng hnenah lawmthu a sawi a. Mamawh tam tak karah MLA Fund hman tangkai theiha a awm chu lawmawm, a ti bawk a ni. NGO hruaitute'n kan tu leh fate rochun zel theih tur thil an ngaihtuah a, hma an la chu fak awm, a ti bawk a ni. NGO te chu thawhpui nuam, midangte dawm kangtu, dinhmun pawimawh chelhtu te an ni, tiin a sawi a. Committee Room chu tangkai taka hman a nih theih nan duhsakna sang ber a hlan bawk a ni.

Zemabawk North Branch YMA Committee Room hi MLA Fund atangin Rs 600,000 senga sak niin, a dung feet 44, avang feet 21 a ni. Vengchhung atanga mi thahnem ngai ten Rs 19000 vel thawh khawm a ni. YMA Hnatlang Vawi 5 neih a ni bawk a ni. Lawmthu sawi nan Deputy Speaker hnenah Zemabawk North YMA Branch chuan Rs 20000 a hlan nghal bawk a ni.

He hunah hian Branch YMA Committee Member, YMA Section OB, MHIP OB, MUP OB, Zemabawk North Local Council Member te leh midangte an tel a ni.

Attachment