Nimin (28.9.2018) khan Chief Minister Pu Lal Thanhawla chuan Mizoram Police Service Association (MPSA) General Conference vawi 10-na, Arya Mess, PHQ Khatla a neih chu hmanpuiin, Mizoram Police te chu mipui thlamuantu leh innghahna an nih angin mipui te tan thian tha ni turin a chah a ni.

Chief Minister chuan MPSA conference a hmanpui thei chu lawmawm a tih thu sawiin, police te chu Mizoramin remna leh muanna a neih kengkawhtu pawimawh ber an nih thu leh an laka mipui beisei pawh a san thu a sawi a. An hna leh an mimal nunah an invawn a, physical fitness te ngaipawimawh a, hotute pawhin an hnuai ami te an enkawl danah a insiam tha zawnga ti thin turin a chah a. Khawvel changkhang zelah sualna pawh a changkan chhoh zel avangin hriatna leh thiamna tihmasawn a in 'update' ve zel a tul thu  a sawi bawk. Chief Minister chuan Mizoram chu India hmarchhak state zinga ralmuang ber a nih avangin kan vannei hle a, mahse chu kan ralmuanna chu mi thenkhatin Dan phalloh thil - Ruihhlo, ralthuam, thingzai leh a dangte tawlhrukna kawng remchangah an hman phah ta niin a lang a, chuvang chuan venhimna thawktu kan police-te hi an pawimawh hle, an hna tha zawka an thawh theih nan tha zawka kan thuam that pawh a tul a ni, a ti.

MPSA Conference hi chawhma lamah rorel in hun hman a ni a, chawhnu lamah Kum 2018-2020 chhunga ban oawl hruaitute thlang a hun hman a ni a. Inthlan hi MJA ten an pui a ni. Tlai lamah Pu P.C. Lalchhuanawma, F&ES Director kaihhruaiin Chief Minister ho hian hun hman a ni a. DGP Pu Balaji Srivastava pawhin thu sawiin, police officer te chu khawtlangah miin an dah pawimawh avangin an thawhna hmunah leh an mimal nunah fimkhur leh invawng taka awm thin turin leh, an hriselna te ngaipawimawh turin a chah a ni. He programme ah hian General Conference neih hnuhnun ber 16.6.2016 atanga 28.9.2018 inkara MPSA member thi (4) te sunna neih a ni a. MPSA General Conference hi vawiinah neih chhunzawmin, Officer thar leh promotion hmu tr lawmna leh chhuak tur thlahna neih a ni. 

Kum 2018-2020 chhunga MPSA Office Bearer-te chu:
President        : Pu Lalbiakzama
Sr Vice Pre.    : Pu Zosangliana
Vice President : Pu C.Lalnunmawia
Gen Secy.       : Pu David H. Lalthangliana
Secy.               : 1)Pu Lalthakima
                           2) Pu Vanlalliana
Treasurer.       : Pu Rex Zarzoliana Vanchhawng
Fin Secy.         : Pu Lalrinawma Traite

Mizoram Police Service Association hi July ni 28, 1995 khan din niin, Mizoram sawrkarin May ni 24, 2002 khan a recognize a ni.

Attachment

  • Loading attachment...