Tukin zing khan ‘World Heart Day’ pualin Vanapa Hall leh Millenium Centre inkarah walkathon neih a ni a. Health Minister Pu Lal Thanzara chuan a hmanpui a. National Programme for Prevention & Control of Cancer, Diabetes, Cardiovascular Diseases & Stroke (NPCDCS) buatsaih a ni.

Khuallian Health Minister chuan kan ramah hian tunhmaa kan hriat lar loh lung natna-heart attack, stroke te a lar ta viau mai a, heng natna inkaichhawn theihloh Non-Communicable Diseases (NCD) te hi khawvela thihna zawng zawng 70% thlentu an ni tawh a ni, a ti a. Non-Communicable Diseases (NCD) natnate hi kan nundan in a zir loh vanga kan neih a ni a, NCD vanga thihna zatve chu heart attack leh stroke vang a ni a, kumtin mihring maktaduai 17.7 in an thihpui a ni, a ti a. World Health Organisation (WHO) chuan heart attack leh stroke 80% hi kan veng thei a ni tih an tarlang a, vaihlo laka fihlim te, ei leh in hrisel te, taksa chet tam tir te a ngai a ni, a ti a. Mahni theuh kan inenlet a ngai a, chi kan ei nasa te, thau leh mawm kan ei nasa te, nilengin taksa che mang lova kan awm te hi a tha lo tak zet a, mitin hian lung hrisel zawk kan neih theih nan mahni tawkah tihtur theuh kan nei a ni, a ti a. Vaihlo nasa takin kan do mek zel a, zawi zawiin vaihlo leh a kaihhnawih ti thin kan tlem tial tial a, mahse thalai zingah kan la tam hle a ni, a ti a. Ram changkang zawkah chuan meizu an tlem zel a, hriselna lamah pawh hma an sawn nasa a ni tiin developing ramah chuan meizu kan la tam a, chuvang chuan ram fing leh changkang zawkte tih dan entawnin meizuk te hi kan sim a tul tawh a ni, a ti a. Kan ram hotel leh restaurant changkang tak takah hian chaw hrisel, lung tana hlauhawm lo, zunthlum veite tana ei ngam hi siam uar lehzual ang u tiin a chah tel a ni.

September Ni 29 hian khawvel pum puiah ‘World Heart Day’ hman thin a ni a. World Heart Federation hmalaknain kum 2000 atang khan kumtin hman thin a ni. Lung natna leh Stroke te hi mihring nunna latu tam ber a ni tawh tih hi mipuite hrilhhriatna atan hman a ni thin a. A thlentu hrang hrang, vaihlo hmanna, awm awl lutuk, ei leh in hrisello tih leh zu in nasat that loh zia te nasa taka puanzar tum a ni a. Mizoramah chuan kum 2016 atang khan hman tan a ni.

NHM Director Dr. Lalrozama, IAS chuan kalkhawmte lawmna thu a sawi a. H&ME Director Dr. T. Lalhmangaihi chuan lawmthu sawina in hun a khar a. Health Department hotute leh hnathawkte, TKP Shalom Mission Vengthlang te an tel a ni.