Vawiin chawhnu khan Mizoram Chief Minister Pu Lal Thanhawla’n Food Testing Laboratory thar, Central Medical Store Building, Zemabawkah a hawng.

Pu Lal Thanhawla chuan hun rei tak ata mipuiin kan nghahlelh em em Food Testing Laboratory hawn a ni ta chu hriselna kawng kan zawhnaah mel lung pawimawh tak kan phun a ni, a ti. Thenawm state atanga ei leh in tur, sa, thlai thar leh thil dang chawk luh reng kan ngaih avangin thil tha lo an pawlh nia ngaihna lian tak nei mahila tihnghaihna dang a awm si lo a, ngaihtha lo takin kan awmna a rei tawh hle tiin Laboratory changtlung tak kan neih tak avangin hemi kawnga kan harsatna hi a su kiang dawn a, hriselna kawngah hmasawnna nasa tak a nih ngei kan beisei, Chief Minister chuan a ti. Mipui mimir hriselna hi sawrkar chuan a ngai pawimawh hle a, khawsak harsa zawkte pawhin hriselna kawnga inenkawlna tha tak an ban phaka a awm theih nan tan kan la a, Medical College pawh harsa tak chungin kan nei thei ta,  a ti a. Hrisel turin a bul thumah kan ei leh in a thianghlim a pawimawh a, mihring ei atana hlo tha lo pawlh a nih leh nih loh enfiahna tur Food Testing Laboratory changkang tak kan neih pawh hi hriselna kawnga hmalakna pawimawh tak a ni, Pu Lal Thanhawla chuan a ti.

Commerce & Industries Minister Pu H.Rohluna pawhin ram tana ro hlu Food Testing Laboratory changtlung tak kan nei thei ta lawmawm a tihzia sawiin he khawl tha nei thei tur hian kawng thui tak zawh a ngai a, hun rei tak buaipui a nih hnuah hawn a ni ta chu a lawmawm takzet a ni, a ti. Hlawkna um avanga mihring hriselna atana pawi thei tur pawlh belh ching te lak atanga kan fihlim theih nan he Laboratory thar hi a tangkai hle dawn, a ti a. Commerce & Industries Department in Export Development Fund atanga a hmuh Food Testing Laboratory chu a enkawltu tur Health Department kutah hlan fel a nih thu Minister hian a puang bawk.

Health Minister Pu Lal Thanzara pawhin Mizoram chu International Boundary a awm kan nih avangin ei tur tam tak foreign atangin a lo lut a, hengte hi uluk taka zirchian leh test vek a tul bakah Mizoram chhung ngeia kan thil siamte pawh quality tha a nih theih nan endik a tul thin, a ti a. Food Testing Laboratory hmang hian heng hi endik theih reng a nih dawn bakah ei tur chauh ni lo drug (damdawi) test nan thleng hman theih a nih dawn avangin Mizoram State hian hriselna kawngah nasa takin hma kan sawn phah a beiseiawm a ni, a ti.

Food Testing Laboratory ah hian ei leh in tur sawngbawlna atana thil hman chi hrang hrang - a hmel tihmawina (colouring agent), a tih rimtuina, a vawnthatna, a tih thlumna te a test thei a. Mihring tana hlauhawm thei chemical chi hrang hrang awm te, ei leh in tura natna hrik bacteria chi hrang hrang te, thlai ei tura tur hlauhawm amaha insiam leh pawlh a awm em tih te a endik theih bakah damdawi, a bik takin antibiotc test thlengin a huam a ni. Food Testing Laboratory a khawl an dah te hi analytical instrument zingah khawvel huap pawha khawl changkang leh tangkai bera ngaih High Performance Liquid Chromatograph te, Ion Chromatograph te, Atomic Absorption Spectometer te, UV-Vis Spectrophotometer te, Polarimeter te an ni a. Microbiology Laboratory a awm tel bakah a bika tui thianghlim siamna tur distillation unit leh soxhlet extractor te a awm tel. Heng khawlte hian ei tur, damdawi leh zu (alcohol) sample a test thei dawn a ni.

Commerce & Industries Department in project proposal siamin Food Testing Laboratory hi Export Development Fund (EDF) hnuaiah hmuh a ni a. Sum sanction zat hi cheng vaibelchhe 3.08 niin Agricultural and Processed Food Products Export Development Authority (APEDA) in processing fee a lak hnuah cheng 2,62,60,000 chu Food Testing Laboratory siam nan hmuh a ni. He project hi a tirah chuan Land Custom Station, Zokhawthara dah tura dil ni mahse hmun hrang hrang atanga bungraw lo lut endik a awlsam zawk nan Aizawlah dah a ni ta zawk a ni.

Hawnna inkhawm hi Commerce and Industries Commissioner & Secretary Pu Zothan Khuma’n a kaihruai a. Pu Lalsawma Pachuau, Joint Director, FDA, Health Department-in technical report pe in Health Principal Director Dr.F.Lallianhlira lawmthu sawiin hun hnung a khar a ni.