Vawiin khan Convention Centre, Lungleiah I&PR Department leh Lunglei DC tangkawp buatsaih NEDP Multimedia Public Information Campaign hlawthling tak neih a ni. Lunglei DC Dr Ankita Chakravarty, IAS chu khuallian niin Lunglei District Department hrang hrang ten an hanthawh tlangpui, hmalakna langsar leh hmachhawpte an hrilhfiah. He hunah hian Sawrkar official-te, MJA Lunglei hruaitute, khawtlang hruaitu VC-te leh tlawmngai pawl hrang hrang aiawh thahnem tak an tel.

He Campaign Pi C. Lalremruati, Lunglei DIPRO kaihhruaiah hian Lunglei DC chuan Democracy rama langtlang (Transparent) Sawrkar a pawimawh zia sawiin Sawrkar kalphung bakah Department hrang hrangte hnathawh leh hmalakna te hriat chu mipuite chanvo a ni, a ti a. Sawrkarin Department te kaltlangin hmasawnna hna tam tak a thawh bakah mipui hamthatna tura duan programme leh scheme hrang hrang a neih te mipuiten kan hriat a tul a ni a ti a. Sawrkar leh mipuite inkara inhriatthiam tawnna boruak tha a awm zel theihna tura he Campaign hi buatsaih a nih thu sawiin kalkhawmte chu inthlahrung hauh lova zawhna te zawta, Department te hnenah thurawnte pe turin Lunglei DC chuan a sawm bawk.

Vawiin Public Information Campaign ah hian Department/Institution 21 – PWD NHD-IV, Agriculture, PWd Lunglei Division, Government J Buana College, Horticulture, P&E, PHE, LAD, Lunglei Government College, Rural Development, CMO, Forest Department, SSA Mission, PWD Electrical, Fisheries Department, Sericulture Department, UD&PA, Irrigation & Water Resources, Social Welfare Department, Soil & Water Coservation, Project Himna MADAT leh Medical Superintendent atangin Presentation ngaihthlak a ni a. Zawhna leh chhanna hun tha tak te neih a ni bawk.