Pachhunga University College leh Mizoram University-a Department of Zoology te tangkawp buatsaih ‘National Seminar on Emerging Trends in Bioscience and Future Prospects’ chu vawiin khan Seminar Hall, Pachhunga University College hmunah Education Minister Pu Lalsawta’n a hawng.

Khuallian Education Minister chuan science hamsawnna hi a chak lutuk a, mi naran leh mipui mimir tan chuan hriatthiam mai pawh a harsa a, amaherawhchu a chhawr tangkai bertu an ni lawi si, a ti a. Science mithiamte hmalakna avangin mihring taksa-a peng leh timur hrang hrang chungchanga hriatbelh a ni zel a, hei hian life sciences hi a ti pawimawh zual a ni. Mizoram ang state tereuhte leh kilkhawr lutukah life sciences mithiamte, ramchhung leh pawn atanga an rawn fuankhawm hi zirlai leh hemi lama tui mite tan chhenfakawm leh hriatna tizautu a nih ngei a beisei thu a sawi bawk.

Seminar hawnna inkhawm kaihruaitu Dr. G.C. Jagetia, Dean, Department of Life Sciences, PUC pawhin thu sawiin kum zabi kaltaah khan DNA hi hmuhchhuah leh zirchian a ni a, chu chuan life sciences zirna chu dinhmun sang leh pawimawh berah a hlang chho hial a ni, a ti. He thil hmuhchhuah tang hian mihring taksa timur leh thisenah te natna hrikin hna a thawh dan hmuhchhuah zel niin chung natna hrikte do let tura damdawi tul ang pawh hmuhchhuah a ni ta zel bawk a, mihring hriselna leh inenkawlna kawng thar nasa takin a thlen theih ta a ni, a ti bawk.

Ni 2 awh tur ‘National Seminar on Emerging Trends in Bioscience and Future Prospects’ hi University Grants Commission (UGC), North Eastern Council (NEC), International Multidisciplinary Research Journal, Science Vision, Mizoram University leh Pachhunga Univerity College te tangho bultum sak a ni a. He Seminar hmang tur hian life sciences mithiamte Mizoram bakah NEHU, Shillong, Gauhati University, University of Calcutta, Arunachal Pradesh University, Khwopa College & Tribhuvan University, Nepal leh Silchar atangin an rawn tel a ni.