Vawiin khan Small Farmers’ Agribusiness Consortium (SFAC) leh Mizoram sorkar tangkawp chuan thlai chin leh sawngbawlna (Agribusiness) tihhmasawnna tura sum dah Venture Capital Assistance chungchang ngaihtuahin State Guest House Conference Room-ah inrawnkhawmna hun an hmanga. He hunah hian Chief Secretary Pu Vanhela Pachuau chu khuallian a ni.

Chief Secretary chuan kuthnathawktu leh thlai huan siam te tana thil chhenfakawm tak SFAC hnuaia Venture Capital Scheme hi Mizo te tan thil thar a nih avangin Department-a thawktute pawhin lo zirchiang se a duh thu leh a chhawr tangkai tur mi te hnena fiah taka puangzar turin a chah a. Thil hriatchian duha bengvartu te hnenah inhawng takin hrilhfiah thin sela, fuihin thil hriattur tul dang te pawh a zau thei ang bera puangzar turin a chah bawk a ni.

Thlai tharchhuah leh dehchhuah kawnga loneitu mimal emaw pawl emaw hnathawh tihchak lehzual nan leh project lian tham deuh an din theih nana sum lu tum puia tanpui hi SFAC chuan a tum a. Bank nena inhmu taka thawkho a pawisa puk tir tlak tur khawpa DPR an siam theihnan a tanpui te, mimalin thlaithar sumdawnna lamah tam zawk leh lian thama pawisa an thap (invest) ngamna tur leh chumi anga thingtlang loneitute pawhin an thlai tharchhuahte man man taka hralhna an hmuh theihna tur leh an sum dinhmun sawhngheha hnathawh tur tam zawk siamsak te hi SFAC thiltum zingah a tel a ni.

SFAC hian kumin sorkar kum kal mek chhung hian Project 5 tal Mizoram tan pek an duh a, heng Project atana senso 25% emaw, Bank in tum ngai (project equity) an tuk ang Project man pumpui atanga 40% emaw cheng nuai 75, heng zinga a hniam ber hi a tumsak anga. A bak zawng chu Bank atangin loan anga pekchhuah a ni thung ang.

Conference hi New Delhi atanga lokal SFAC Managing Director Pravesh Sharma chuan a kaihhruai a, Mizorama Growers Society hrang hrang aiawh te, Bank hotute leh sorkar Official thenkhat te an tel a ni.