Kolasib Town Road Development Coordination Committee chu an chairman Pi Niharika Rai, DC hovin nimin khan DC office chamber-ah an thukhawm a. Kolasib khaw chhung kawng siam hna thawh dan an thlir ho.

Kolasib Town Road siam hna hi NBCC kaltlangin CT.Mawia Construction Company –in a thawk a. Kum 2008 January ni 9 khan bul tanna turin khatih laia UD&PA Minister chuan Kolasib Shopping Centre –ah a hawng a ni. Hawn a nih atanga thla 15 chhunga zawhfel tura MOU pawh ziah a ni a. Amaherawhchu chhuanlam tamtak avangin hna hi a khaihlak nasa hle a, vawiin ni thlengin thawh zawh ala ni lo a ni.

Pi Niharika Rai chuan Committee-ah hian Kawng siam hna muang lutuk chu a hriatthiam theih bak thil a nih tawh thu leh kum thum lai a liam hnu pawha chhuanlam siam a ni reng mai chu a ngaithiam thei tawh lo tih a sawi a. Hmanraw/ chak lak harsat thu leh chhuanlam dang an siam te chu kawng siam hna thawh dawna Agreement siam a nih laiin chutiang ngaihhnathiamna chu a tel ngailo tih a sawi a. Mipui te manganna a zahawm a, hna tikhawtlai tawh lova chak taka thawk tawh turin Contractor te chu a hrilh a ni.

NBCC te hian an thawh zawh hun tura ruat sa chhunga an thawh zawh hman dawn loh avangin Town road committee ah hun pek belh turin an dil na chu, Town Road Committee chuan an thawh zawh hun tur hi a thara bituk sak lehin Package I chu 31 March 2012 ah a pawhsei sak a. Package II chu 30 June 2012 ah a bituk sak bawk a. Hun bituk thar hi zawm ngei turin an hriattir a. DC chuan thil man sang leh chhuanlam dang chu a hriatpui tur thil pawh a nih loh thu leh hun bituk chhunga an zawh loh chuan sawrkarah hna thawk thei lo tia thlen hial a tul dawn thu leh chu chu a thil hreh tak a ni, a ti a. An hna thawh dan Quality thuah pawh complaint tamtak a dawn tawh thu a sawi bawk a ni.

Committee ah hian member te chuan hna tih khawtlaia a awm nasat avangin an beiseina leh rinna an hloh zo tawhin hna tha/ rotling an beiseina a bo zo tawhin kawng mam satliah mai pawh an thlahlel ta a ni, an ti a ni.

Committee hian kawng siam endik hna thawk turin an zing atangin member 5 an ruat nghal a. An thil hmuhte chu Chairman hriattirin a tul anga bawhzui zel a ni dawn a ni.