Nimin khan Association of Faculty, District Institute of Education Training (ASOF, DIET), Lunglei leh Aizawl District te chuan Aizawl DIET Auditorium-ah General Conference vawi 2-na an hmang a, Education Minister Pu Lalsawta chu Khuallian a ni.

 

 

Khuallian chuan thu sawiin Mizorama zirna siamthat chu sorkarin a ngaih pawimawh berte zing ami a ni a, chumi atan chuan Education Department kalphung thlak danglama, DIET pawh hman tangkai chho zel a ni ang, a ti. Khawvel hmasawnna milin Mizo thalaite zirtir leh chherhchhuah danah kan duhtuiin kan uluk a ngai tawh a, Mizo tawng an thiam em em rualin tawng dangte pawh ngam taka an hman theih turin kan zirtir a tul a. Zirlaite chu ‘by-heart sytem’ mai ni lovin an zirlai hrethiam tak tak thei turin kan zirtir an tul tawh a ni, a ti bawk. Hemi atan hian zirtirtu training that a pawimawh em em a, chu chu DIET kaltlangin sorkarin a tul ang zelin a bawhzui tur thu a sawilang. Mizoram zirna kalphung siamthat dan tur ngaihtuahin sorkar laipuia Education Reforms Commission member-te chu Mizoramah an rawn zin thuai ang a ti a. Ram leh hnam hmasawn tak tak tur chuan zirna hi a pawimawh ber a, chuvangin Mizorama mi chengte pawh hmantlak/hnathawk tlaka siam chho turin sorkar chuan theihtawp a chhuah dawn a ni, a ti.

A sawizelnaah Minister chuan khaw thenkhatah zirtirtuten an aikal tur midang an rawih tih sorkarin a hria a, hetiang thil hi tuna sorkar tharah chuan ngaihzam a ni dawn lova, hetianga dan kalha chete chu hrem an ni ngei ang tih a sawi. Education hmang hian Mizoramah khua a la var dawn a ni tiin Pu Lalsawta chuan Mizoram zirtirtute chu hmun danga zirtirtute aia an chhiatna a awm lova, tun kuma HSLC leh HSSLC result tha tak kan nei theite pawh zirtirtrute thawhrah duhawm tak a ni, a ti. Mizo zirlaite chu India ram mai ni lo khawvel hmun khawiah pawh a langsar leh thiam pawl an ni thei a, zirna lamah ‘change’ siam tur chuan mi zawng zawng kan tanrual leh kan thawhhho a ngai a ni tiin kalkhawmte a fuih.

ASOF DIET Conference inkhawmah hian an pawl member zawng zawngte chuan Khuallian Education Minister hmaah Mizorama zirna quality tlachhe mek siamthatna tura sorkar hmalakna a din ‘Education Reforms Commission’ chu an thlawp tur thu leh a hlawhtlinna turin theihtawpa thawhpui an in huam thu an tiam a. Mizorama Elementary Education leh Elementary Teachers’ Education-a quality improvement a awm zel theih nan tun aia nasa zawka tan laka theihtawp chhuah turin thu an tiam bawk a ni.

SCERT Jt. Director Pi Sangthanmawii chuan Mizoram Education-in hma a sawn tak tak tur chuan zirtirtute’n training an neih a pawimawhzia thu a sawilang a. Hemi atan hian SCERT leh DIET te chuan zirtirtute tan uluk taka training syllabus leh teaching aids te an buatsaih thin thu sawiin Pi Sangthanmawii chuan sorkar pawhin heng ruahmanna awmsa te chu tun aia tangkai zawka a hman thiam a pawimawh a ni, a ti.

Aizawl DIET Principal Pi Zohmingthangi Varte leh Lunglei DIET Principal Pi Lalsangpuii Sailo te pawhin thu an sawi a. Mizoram chu ziak leh chhiar lamah 2-na ni mahse khawvel hmasawnna chak tak mai umpha zel tura zirna kalphung herrem thiam a tul a, hemi atan hian DIET pawh intuaihriam zela zirtirtute chu hmanrua thar leh zirtir dan thar leh tha zawka thuam a inhuam reng a ni, an ti.

Conference chawhma lama kum 2009 chhunga ASOF DIET (Aizawl & Lunglei) hruaitu thar thlanna an neih nghal a, a hnuaia mite chu thlantlin an ni :
1. President        :    Pi Zochhuani, Sr. Lecturer, DIET, Aizawl
2. Sr. Vice-President    :    Pu Lalnuntluanga Hnamte, Sr. Lecturer, DIET, Aizawl
3. Vice-President        :    Pu D. Sangzuala, Lecturer, DIET, Lunglei
4. Gen. Secretary    :    Pu K. Lalhmachhuana, Lecturer, DIET, Aizawl
5. Jt. Secretary        :    Pu F. Lalramliana, Lecturer, DIET, Aizawl
6. Asst. Secretary    :    Nl. V. Lalliansangi, Lecturer, DIET, Lunglei
7. Treasurer        :    Nl. Vanlaltluangi Renthlei, Lecturer, DIET, Aizawl
8. Finance Secy.        :    Pi Biaklalzawmliani, Lecturer, DIET, Aizawl
9. Secy. i/c Info.& Pub:    Pu H. Lalchhandama, Lecturer, DIET, Aizawl.