Vawiin chawhnu dar 1.00 khan Education Minister Pu Lalsawta chuan Mizoram Hindi Training College (MHTC) Women’s Hostel, Durtlang North-a mi chu a hawng. He hmeichhe hostel hi Central sawrkar pawisa pek atanga sak a ni a; a sakna atan hian Rs77,54,000 sen a ni. Hostel building hi chhawng 3 a ni a, zirlai 40 khawsak theihna tura ruahman a ni.
Pu Lalsawta chuan, “Zirna tha hi building neih thatah a innghat ber lova, a chhunga khawsa zirtirtute leh zirlaiteah a innghat zawk a ni. Mizoram sawrkarin Hindi zirna hi a ngai pawimawh hle a, chuvang chuan MHTC-a Hindi zirtirtu thawklai leh zirtirtu atana inbuatsaih mekte hian Hindi tualchher ni lo, Hindi tawnghmang dik tak naupangte in zirtir thiam tur a ni” a ti. Education Minister chuan Mizoram sawrkarin zirna peng hrang hrang hmasawnna tura theihtawp a chhuah mek thu sawiin, “ MHTC tihchangtlunna tur leh mamawh dangte pawh sawrkara a mawhphurtutenkanhria a; nimahsela,kanmamawh zawng zawngte hi tihpuitlin vut vut theih a ni bik lo tihkanhriat tel a pawimawh a. Kan harsatnate chu dawhthei takin nghak ila, sawrkar nawr tura pawnlam mi leh pawlte pun i chinglo ang u” a ti.
Chairman Pu K. Lal Nghinglova IAS, H&TE Commissioner chuan Hindi zirtirtu ni si, Hindi tawng hmangthiam thathum lo an awm chu inenletna tur pawimawh tak a nih thu a sawi a. “India rama kan chen chhung chuan Hindi tangkaina leh pawimawhna hi a zual tial tial dawn a; chuvang chuan Mizoram-a Hindi zirtirtute hian in hna hi in thiambel hle a ngai a ni” tiin Hindi zirlaite a fuih a ni.
MHTC hi 16th October, 1975 khan National Council for Teachers’ Education (NCTE) hriatpuiin a lo ding tan a; a din tirh atanga 13th Sept. 2005 thlengin Aizawl-ah mi in luah hawhin an inbun a. Kum 2005 tawp lamah tuna MHTC Residential Complex, Durtlang North-ah hian an insawn a ni. Tunah hian Hindi Course chi hrang 3 – Bed te, Diploma course 2 – Hindi Teaching leh Hindi Education te a zir theih a ni. Zirlai 140 tana training-na hawn a ni a; Principal bakah Associate Professors 5, Contract Lecturers 2, Part time Lecturers 3 leh attached Lecturers 3 bakah thawktu dang mi 23 an awm a ni.
