Vawiin khan Education Secretary Pi Esther Lalruatikimi'n Vanapa Hall-ah Govt. Chaltlang Higher Secondary School 2011 HSSLC Exam a Result an neih that lawmna leh zirlai tharte lawmna inkhawm a hmanpui.

Pi Estheri chuan Govt. Chaltlang Higher Secondary School chu result tha tak an neih avanga a lawmpui thu sawiin Result tha neih chhunzawm zel turin duhsakna a hlan a. Zirlai kal khawm te hnenah Pathian hriatna leh thil tum (ambition) hriatchian chu hlawhtlinna bul a ni, a ti. Pi Esther-i chuan zirlaite chu theihtawp chhuaha tan la tura fuihin mahni tih theih ngei tur leh tihhlawhtlin theih ngei tur ruahmanna siam thiam turin a chah bawk a ni.

Govt. Chaltlang Higher Secondary School hian kumin HSSLC Exam-ah khan Arts Stream-ah pakhatna, pahnihna leh pangana dinhmun an hauh a. Political Science, Geography leh Psychology subject-ah titha ber nihna hauhin exam zawng zawng za zela 92 an passed a ni. 1996 a din he school atang hian zirlai 2041 in HSSLC an passed tawh a. HSSLC Exam vawi 14 neih tawhah vawi 8 a pumpuia pakhatna nihna an hauh tawh a. top ten-ah mi 49 awm tawhin Subject mala titha ber mi 49 an lo awm tawh a ni.