Vawiin khan Mizoram State Museum, Art & Culture Department buatsaihin International Museum Day hman a ni a. He ni denchhen hian Mizoram State Museum chu a duh apiang tan en man chawi lova tlawh theiha hawn a ni a, mipuiin an hlut hle. School sawm bik pali (4) atangin school naupang thahnem takin Museum hi an tlawh bawk a ni.

Kum 1977 khan Inter-National Council of Museum (ICOM) chuan khawvel puma Museum hrang hrangten mahni remchan dana tangkai taka hman tlan turin May ni 18 hi Inter-National Museum Day atan a puang a. Mizoram State Museum pawh hian he ni pawimawh hi tum 7 lai an lo hmang ve tawh a ni

Museum-ah hian Mizo hnam rohlu chi hrang hrang 3702 lai dahkhawm a ni a, heng zinga 723-te hi Gallery hrang hrang a thenin showcase-ah pho chhuah an ni a. Mizorama zirna thar hman a lo nih tak atang phei chuan a bik takin zirlaite tan a tangkai em em a ni. Platen (Treadle) Printing Machine, German lunghlu chhertu Johannes Gutenberg-a'n kum 1440-a a hmuh chhuah, August,1973 a Printing & Stationery Department-in Rs. 5000/- a an lei chu Art & Culture Minister Pu P.C. Zoram Sangliana hmalaknain Museum-ah hian May 9, 2011 khan dah thar a ni a. Mizorama lehkha chhutna khawl kan hman hmasak hi Museum tlawhtuten an hlut hle.