Vawiin khan Environment, Forest & Climate Change Department chuan PCCF Conference Hall, Tuikhuahtlang ah 3rd Quarter Review meeting an nei.
He Review Meeting hi Pu Lalram Thanga, IFS, Principal Secretary & PCCF, EF&CC Department chuan kaihruaiin, Sorkar laipuiin Project hrang hrang kalpuina atan "Cashless transaction" hman uar a tum thu a tarlang a. EF&CC Department-ah pawh a theih ang a tam Direct Benefit Transfer (DBT) hi hmang turin thawktute a chah a. PCCF chuan khawvel thang zel ah mihring ten ramngaw kan mamawhna a nasa zel a. Chutih laiin kan ramngaw leh nungcha te an chereu zel bawk a. Hei hi hriain Govt.of India pawhin ramngaw leh nu gcha humhalhna atan inkaihhruaina (guidelines) thar a tihchhuah zel thu leh, Ministry hrang hrang ten project lian an kalpuiah pawh environment humhalhna leh ramngaw humhalhna lama hmalakna tur an dah zel tawh tih a tarlang a. State Forest Department pawhin hei hi hriain, plantation-te hlawhtling ngei tura enkawl leh venhim a pawimawh thu sawiin, Tall Seedlings (thing tiak lian) hmang uar turin DFO te a chah bawk. Mipui te hnenah private plantation pawh uar leh zual tura zirtir tur leh, puih an ngaihna apiangah inhawng turin thawk tu te a chah a ni.
Chief Conservator of Forests (Administration) leh Chief Conservator of Forests (Planning) te hnen atangin 2nd Quarter Review meeting-a hma lak tura chhawp chhuah te leh hmalakna te ngaihthlak a ni a. Green Mizoram Award thlanna atan a inkhaihhruaina thar chu pawm a nih thu tarlan a ni bawk. Wood Base Industries guidelines thar pawh siam that a nih thu tarlan a ni a. Hei bakah hian tun hnai a Vulture (Himalayan Griffon ) mimalin an man thlalak social media a lo lang chung chang sawi lan a ni a. He tiang thil a awm chuan Vulture Conservation Breeding Centre, Pinjore, Haryana te nen a thawk ho in a rang thei ang a hma lak ni se tih a ni a. Diclofenac hman chu Mizoram-ah pawh khap a nih tawh avangin DFO ten khapna dan hi an bial theuhvah kengkawh tura beisei an nih thu tarlan a ni bawk.
He meeting-ah hian DFO ten 3rd Quarter chhung a achievement an neih te power point presentation hmangin an tarlang a. Hmasawnna tur awm te tarlangin 4th Quarter-ah chuan tha leh zual a thawk turin meeting a kal te chah leh hriat tir an ni.
Vawiina 3rd Quarter Review meeting chuan ramngaw, nungcha leh environment pumpui venghim turin Integrated Approach a pawimawh tih tarlangin, plantation siam leh a venhim te, mipui, NGOs leh local institution-te zirtirna pek leh thawh ho bakah modern technology - GIS leh Total Station-te nasa leh zual a uar turin thu tlukna siam a ni a. Mizoram Forest Service atanga IFS – a kai thar Pu Kawlhnuna leh Pu C Lalbiaka te hnenah lawmpuina thu hlan a ni bawk.
