Vawiin dar 10:30 khan School Education Directorate Conference Hall-ah SSA leh RMSA District Project Coordinator meeting neih a ni a, School Education Secretary Pu P. Lalchhuanga, IAS –in a hmanpui.

Khuallian Pu P. Lalchhuanga, IAS chuan mihring inchherna , human resource berin hma a sawn loh chuan ramin hma a sawn theih loh thu sawiin, “ eng system pawh awm se, a tihhlawhtlinna lamah a that tawk loh chuan kawngro a su tak tak thei lo a ni” a ti. Thawktute chu an hnathawh Pathian rawngbawlnaah ngaia Missionary rilru pua rinawm taka thawk turin a fuih a ni.

School Education Secretary chuan Mizoram sorkar hnuaia School hrang hranga zirtirtu indaihloh thu sawiin Primary School-ah ringawt pawh chawhrualin Sikul pakhat tan zirtirtu 3 ang zel chauh an awm thu a tarlang a. Zirtirtu indaihlohna tihziaawm nan hian Office- a in attach teuh lova School-a indah tam a tul thu a sawi bawk a ni.

School Education Director, Pu K. Lalthawmmawia, IAS pawhin thu sawiin, District tin atanga Staff kalkhawmte chu Education atana ruahmanna tha neih a tul thu a hrilh a. “Education Department hi Department malkhaiah chuan a aia pawimawh a awm lo tia sawi ngam a ni”, a ti. Mizorama sualna chi hrang hrangte hi a bul han chhui chuan zirna lama an kalkawng a tluan tawk loh vang a nih thu a tarlang a. Hemi avang hian zirtirna dik leh kalphung tha neih a pawimawh thu a sawilang bawk a ni. Mizorama Zirna kalphung siamtha turin Department-a thawktute chuan mawhphurna an neih thu hrilhin mahni hmazawna tihtur an neihte tha taka hlenchhuak turin a chah a ni.

Meeting hi Pu Lalhmachhuana, SPD, SSA in a kaihhruaia. He meeting-ah hian kum thar 2017-2018 atana SSA leh RMSA Plan siam dan tur sawiho ani a, State Project Office leh District tina District Project Office-a thawkte an tel a ni.