Vawiin chawhnu khan Parliamentary Secretary Pu Joseph Lalhimpuia hovin a pisa-ah SSA Employees’ Association of Mizoram (SEAM) hruaitute leh Mizoram SSA hotute chuan hun rei tak chhung hlawh an lak theih tawh loh chungchangah an thukhawm.

SSA thawktute hlawh lak theih loh chungchanga Mizoram Sorkar hmalakna hrang hrang leh thlen chin te vawiin hian inhrilhhriat a ni a. Sorkar laipuiin Mizoram SSA pawisa tur Rs. 19625.21 lakhs a approve tawh atanga vawiin thlenga Rs. 4318.83 lakhs chiah a la pek chhuah anih avangin August, 2016 atanga vawiin thlengin SSA hnathawktute’n hlawh an la la thei lo a. SSA hnathawktute’n hlawh an lak thuai theih nana Mizoram Sorkarin theihtawpa hma a lakna chu SEAM hruaitute chuan lawmawm a tih thu an tarlangin, SSA hnathawktute chuan hun reilote chhunga hlawh an lak theih an beisei thu meeting-ah hian tarlan a ni.