Mizoram rawn tlawh mek Director General, Border Roads Lt Gen Suresh Sharma, AVSM chuan vawiin tlai khan Mizoram Governor Lt Gen Nirbhay Sharma, PVSM, UYSM, AVSM, VSM, (Retd) chu a chenna Raj Bhawan-ah tlawhin Mizoram chhunga BRTF kawngpui enkawl mek chungchang a sawipui.

DG Border Roads Lt Gen Suresh Sharma chuan Mizoram Larsap hnenah Mizoram chhunga kawngpui an siam leh enkawl chungchanga harsatna an tawh hrang hrangte a hrilh a. Tun dinhmunah Project Pushpak hnuaiah Mizoramah chuan an kawng enkawl a tlem tawh avangin taskforce 1 chauh an dah tawh thu leh sum lamah harsatna engemawchen an neih avangin hei aia changtlun zawka Mizoram chhungah hna an thawh theihna tan lakpui turin Larsap a sawm a. BRTF chuan Lengpui Airport-Buichali kawng leh Mizoram chhimlama kawngpui thuam 3 siamthat nana sum an hmuh tawh thu hrilhin kawngpui siam/zauh nan ram an mamawh belh tur chu state sorkar hnenah an thlen tawh thu a hrilh bawk. DG Border Roads Lt Gen Suresh Sharma hi CE Pushpak Pu KK Razdan-in a rawn tawiawm a ni.

Mizoram Governor Pu Nirbhay Sharma chuan ramchhung hmun hrang hranga BRTF te hnathawh fakin Mizoram chhungah pawh an thawhrimna zarah kawngpui tha hmun kilkhawr ber thleng a awm phah a ni, a ti a. Tun hnaia Mizoram chhimlama a zin a, Parva khua thleng a kal thu sawiin BRTF kawng enkawl lai pawh a chhe hle tawha a hmuh thu a hrilh a. DG-in harsatna a sawite chu lo bawhzuipui a, theihtawp a lo chhuahpui tur thu a hrilh a ni. Act East Policy tun aia chak zawka kalpui a nih theih hunah chuan hmarchhak bial phei chu hmun pawimawh tak a luah dawn avangin kawng tha neih chu thil pawimawh berte zinga mi a ni ang, a ti bawk.