Nimin tlai khan Chief Minister Pu Lal Thanhawla chu Border Roads Organization (BRO) hotupa Director General Lt. Gen. Suresh Sharma in a chenna in CM Bangla ah hmuin Mizorama BRO hmalakna leh an hma lak zel tumna te a hrilh.

Chief Minister Pu Lal Thanhawla chuan Border Roads Organization ten Mizoram tan hun hmasa lamah nasa taka an thawh thu te sawiin BRO leh Mizoram mipui te inkarah inlaichinna tha tak leh thawhhona tha tak a awm a, rambuai lai pawhin inhriatthiam lohna engmah awm lo mahse tunah chuan BRO ten China ral lian tur venna kawngah Arunachal Pradesh chu an ngaipawimawh niin a lang a. Mizoram pawh ramri depa awm anih angin ngaihpawimawh a tul a ni, a ti. Lt. Gen. Suresh Sharma chuan Mizoram chu BRO ten ngaipawimawh mahse Ministry of Surface Transport in fur lai kawng enkawlna tur leh kawng thuamthat atan chauh sum an pek avangin kawng thar siamna atan Ministry-in sum an ruahman tlem a chuti chungin Mizoram Chhim lamah kawng thar siam tur pathum – N.Vanlaiphai-Thingsai-Bualpui-Saisih-Pangkhua; Zawngling-Mawhre-Chapui leh Dungtlang-Vaphai-Farkawn re ruahman a ni a ti a. Heng kawng ahte a rang lama hna an tan thei nan, land acquisition a tul ang te chu tihfel sak turin a ngen. Heng kawng ruahman te hi naktukah helicopter-in a enkual tur thu Chief Minister hi a hrilh a. Heng kawng bakah hian Lawngtlai-Diltlang-Parva leh N.Vanlaiphai-Thingsai(via Cherhlun) kawng te thuamthat nan ruahmanna an neih mek thu a sawi bawk a ni.

BRO Director General tawiawmtu, Project Pushpak Chief Engineer Pu A.K. Razdan chuan tunhnai mai khan Ministry of Road Transport and Highways-in Buichali-Lengpui kawng thuamthatna tur project an thehluh chu pawmfel anih thu leh he hna hi hun reilo teah thawh tan an beisei tih Chief Minister hi a hrilh a. Seling-Champai kawng chu Mizoram PWD kutah hlan nih mahse Mimbung-Champhai kawng ruahman turin hma lakna an nei mek tih a sawi bawk.

Chief Minister hian NH-54 tlang kawng (Kawnpui-Sihphir) thuamthat anih theih nan BRO hotupa chu theihtawp chhuah turin a ngen a. BRO DG hian Mizoram kawng BRO in a enkawl leh a ruahman mekteah chak taka hma lak a tum thu Chief Minister a hrilh a ni.

Attachment

  • Loading attachment...