Nimin khan Hriphaw khua chuan an khua a YMA mei mit lova a din champha phak kum 75-na Platinum Jubillee chu an lawm a, he hun hi Pu Lalrinmawia Ralte, Minister Environment, Forest & Climate Change, Labour Employment & Industrial Training, Co-Operation , Soil & Water Conservation Department, Bialtu MLA ni bawk chuan khuallian niin a hmanpui.

He hun hmanpui tu Pu Lalrinmawia Ralte chuan Hriphaw khua-in YMA Platinum Jubillee hial an lawm thei chu a lawmpui thu sawiin hetiang hun thleng thei tura hruaitu hmasate fakawm a tih thu a sawi bawk.

Minister chuan kan hnam zawng zawng huap tura pawl ropui, a hun taka tihtur tia, midangte tana luangchhuak thin YMA, din a nih theihna turin kan zosap Missionary te kaltlanga zofate min phuar khawm turin Pathianin rem a lo ruat ni a ti a, YMA chu kan ram leh hnam humhalh tu, mitin huap pawl awmchhun, hnamzia chawinungtu, chhiatni thatni tumah tihbik nei lova, mizote min chawimawitu a ni tiin YMA hi awmta lo se mizo mipui te hi enge kan dinhmun ni ang tih ngaihtuahna na chang hria he pawl ropui zia hre zual zel turin kalkhawmte a chah a ni.

Pu Lalrinmawia Ralte chuan tun meka YMA member te chu kan mi hmasate’n harsatna leh buaina tam tak kara mei mit lova an lo kal tang tangna chu zahsakin Tlawmngaihna, Aia Upate zahthiam, Midangte tanpui thei tura a hun taka lungchhuak theitu ni zel turin a chah bawk a ni.

Jubilee lawmna inkhawm hi Pu M.S Dawngliana Fanai, President chuan a kaihruai a, YMA din tirh a ni atanga a kal chhoh dan report Secretary Br YMA hnena atangin ngaihthlak a ni a, Jubilee zaipawl te thiam takin an zai bawk. Souvenir Sub Committee in an buatsaih Lungpuisang tih chu tlangzarh a ni.

Hriphaw khua YMA Platinum Jubilèe hi ni 11 January 2017 zan atanga khan lawm tan a ni a, khawchhung tihfaini, Hlim zan, Lamthai Ni ten hun hman a lo ni tawh a ni a, a lawmna pui ber chu ni 13 January 2017 hian neih a ni a, Jubilee ruai ropui tak khawtlangin kilho a ni. Ni 15 January hian Jubilee mei det leh Jubilee kharna hun hman a ni ang Hriphaw khua hi Mamit District khawthlang lam Assam ramri dep a awm a ni a, tunah hian YMA member mipa 153, Hmeichhia 89 awmin an vaiin member 242 an awm mek a ni.

Minister hi Pu Lalthakima, P.S, Pu Lalthangchhunga Fanchun, D.O, Mamit leh Pu Paul Rokima, DIPRO, Mamit ten an tawiawm a ni.