Vawiin khan Agape Social Centre ,Positive Women Network of Mizoram (PWNM) leh Light of Hope Ministry te tangkawp in a an huaihawt Heart to Heart Meeting with Namkwang Presbyterian Church Youth (S.Korea) chu Tourist Lodge ah neih a ni a. He inhmuhkhawmah hian Health Minister Pu Lal Thanzara chu khuallian niin a hmanpui.
Pu Lal Thanzara chuan “Mizoram chu India rama HIV vei tam ber dawttu kan ni chu a vanduaithlak a, a doletna kawngah Mizoram mipuite kan tanrual loh chuan AIDS natna hian min vaihma vek thei a, chu vangin a doletna leh a laka invenna kawngah tumah Kut kuangkuah thei kan awmlo” a ti. AIDS doletna leh a laka invenna kawngah Sawrkar chuan nasa taka hma a lak thu tarlangin, tun hnai mai ah pawh US Ambassador to India in MSACS Office a tlawh tumin AIDS doletna kawnga thawhpuiah Mizoram Sawrkar chuan a sawm thu a tarlang a ni. Hemi bakah hian Mizoram a Kohhran lian 2 Presbyterian leh Baptist kohhran te chu Mizoram Sawrkar nen AIDS doletna kawngah thawkho mekin Awareness Campaign leh inenkawlna dan te pawh an tlangaupui thin thu a sawi a. Kohhran Platform chu Platfrom pawimawh berte zinga mi a nih thu sawiin Mizorama kohhran hrang hrangte chu AIDS doletna leh a laka invenna kawnga thawhhopuiah Health Minister chuan a sawm.
Pu Lal Thanzara chuan AIDS vei kalkhawm te chu fuihin, AIDS natna avanga lungngaia indawmkun mai loin, engkim tithei Pathian nung rinchhana huaisen taka nung turin a chah a. AIDS natna chu natna dang ang tho in natna pakhat ve mai ani tih hria se a duh thu a hrilh a, damdawi te tha tak leh a hun taka lak chuan mi pangai nunga an nun theih thu leh mi pangai dam chen an dam theih thu a hrilh a ni. Tin khawtlangah pawh inkiltawih lo se a duh thu a hrilh bawk a ni. Hetih lai hian mipuite te pawhin AIDS veite laka kan rilru puthmang leh kan endan ah pawh hmasawnna tur kan la neih thu a tarlang a ni.
He inhmuhkhawmah hian Upate pawh telin khuallian chuan upate chu khawtlang timawitu leh thlamuantu an nih thu a sawi a. Technology sanna khawvelah hian tangkaina nei tawh loa inhre lo turin leh lo inkiltawih mai lo turin a chah a. Mizoramin an tawnhriat leh an finna a la mamawh zel thu sawiin Pathian pawhin rawngbawlna lamah a la hman dawn chauh thu te a hrilh a ni. Khaullian chuan AIDS doletna leh a laka invenna kawngah leh Upate chu mamawh leh harsatna an neih chuan anmahni pui turin Sawrkar chu a inrin reng thu hrilhin Sawrkar lakah pawh inthlahrung lo turin a chah a ni.
Inhmuhkhawmah hian South Korea Namkwang Presbyterian Church atangin khualtha thahnem tak, tualchhung atangin mi thahnem tak leh pawl hrang hrang aiawh te leh Heart to Heart member (HIV veite) an tel a, thu sawi ngaihthlakna, mal zai leh intihhlimna chi hrang hrang hmangin nilengin hun tha tak an hmang a ni.
