Vawiin khan Swach Bharat Mission (Gramin) Public Awareness Campaign chu Pi Lalbiaksangi District Bawrhsap hovin Darlak leh Bawngva khua-ah neih a ni.

Heng khua a mipui hrilhhriatna campaign neihna ah hian Pi Lalbiaksangi District Bawrhsap chuan Faina leh thianghlimna hi hriselna bul a ni a, hrisel hi damreina a ni tiin chumi nei tur chuan kan in leh a chhehvel kan vawnfai a ngai a, inthiarna mumal lo leh ekin ni lova kan zun leh ek kan thlahdah chuan kan hrisel thei dawn lova, inthiarna bikah chauh zun leh ek thiar nachang kan hriat a ngai a ni a ti, chu chu changkanna leh damreina a ni a ti bawk.

Pu Lalropuia EE, PHED chuan Mamit District chu ODF District kan nih theihna turin mitin ten inthiarna mumal leh tha kan neih angai a, heihi sorkar pawn a ngai pawimawh takzet a ni a ti, kan district chu ODF district a puan a nih theihna tur chuan kan zavaia tan kan lak a tulzia uar takin a sawi.

EE, PHED, Mamit chuan Bawngva leh Darlak khuaah te tan hian Swach Bharat Mission hnuaiah ekin sak tanpuina chhungkaw 200 dawn pek an ni tawh a, heng tanpuina dawng tawh te bakah hian a tul dan a zirin an mahni khua zirchiang chungin sanction a awm leh veleh tanpuina pek leh tum an nih thu a sawi a. Tanpuina dawng tawh ten inthiarna (Ekin) an sak dan chu a hmunah enfiah nghal a ni bawk.

Heng khua a Awarness Campaign neihna ah te hian CMO, Office tangin Dr Nancy Lalnunmawii leh Lalhmunsanga Fisheries Extention Officer, te pawhin thusawina an nei a ni.

Vawiin Public Awareness Campaign hi Bawngva ah BNRGSK Hall ah neih niin VCP Pu Lalbiakmawia chuan a kaihruai a, Darlak ah hian Communuty Hall-ah inhrilhhriatna hun hi neih niin Pu Lalchhanhima, VCP chuan a kaihruai thung a ni, heng khuah te hian mipui thahnem tak kalkhawmin zawhna leh chhanna hun tha tak neih nghal a ni bawk.