State pum huapa kangmei chhuak thei venna committee, State Level Committee on Fire Prevention, kum 2000 atanga hman tan chu vawiin khan an Chairman Pu Lal Thanhawla, Chief Minister hovin a office conference room-ah thukhawmin, State Level Sub Committee on Fire Prevention rorelte pawmpui turin an thlirho.

Chairman Pu Lal Thanhawla chuan kan piputen lo an hal avanga kangmei chhuak thei lakah an fimkhur thin thu sawiin, tunah hian kan peih ta vaklo em ni tiin, ram tikang duh hrim hrim misual kan awm a, sorkar hun tiam chhunga hal duhlo te leh roadside reserve hal kang duhte hrem ngei an anih theih nan dan lekkawh turin hma kan lak ho a tul a ni, a ti a. Ram kang venna kawngah tlawmngai pawlte nena  thawhhona tha tak kan nei hi a lawmawm a ti a. Kan ram kan tihchhiat lutuk hmain engemaw kan tih a tul tiin, ramngaw leh thing leh mau te, chungleng savate leh luia nungcha te tha taka humhalh nachang kan hriat tlan a pawimawh tak meuh a ni, a ti a.

Sub Committee in a lo rel tawh angin Fire Prevention Week hi kuminah chuan kum dang aia hma a hman nise a tih chu ni 6-11 February 2017 hi Kangmei Venna Hapta ah hman nise meeting chuan a ti a. A hawnna hmun atan Lal Thanhawla Auditorium ni turin a pawm a, Chief Minister chu khuallian tura beisei a ni a. District hrang hranga lo hal hun inanga neih a harsat avangin kum danga tih thin angin 15th March aia tlai lovah hal zawh vek nise a ti a. Lengpui Airport leh a chhehvel khuate leh Kawnpui lam thleng pawhin meikhuin thlawhna tum leh thawkchhuak a tihbuai loh nan chawhnu dar 3:30 PM hnuah chauh hal nise a ti a. Mimal Lo/Huan hal hun tur zawmlo te chungah V/C ten hremna lekkawh ngei se, a khaw pumin an bawhchhiat chuan District Level Fire Prevention Committee in hremna lekkawh ngei bawk se an ti a. Sorkar-in lo hal hun chhung tura a ruahman chu tha taka zawm anih theih nan LAD hnenah a hnuaia V/C te chu uluk taka chik tura hrilh hriat nise meeting chuan a ti a. Hei bakah Chief Secretary in DC tinte chu hemi chungchangah Video Conferencing neihpui se tih rel bawkin, GAD lam atangin DC tinte chu khauh taka kalpui tura thupek siam bawk se an ti a ni. BRTF leh PWD te’n kawng siamna atana Bitumen an halna lamah kangmei tichhuak lo tura fimkhurturinhma lo se tiin meeting chuan a rel bawk.

Lo hal hun bituk zawm loh hi meeting chuan a ngai thutak hle tih tarlan a ni bawk a. DC, DLAO leh V/C te chu lo haltu te list tha taka vawng tur leh dan zawmlo te chhinchhiah tura hriattir nise tiin May ni 15 aia tlai lovah ram dan zawm lo te chunga action lak dan report kimchang chu Sub-Committee on Fire Prevention hnen ah thlen ngei nise an ti bawk a ni.

Kangmei veng tha district leh khua anga lawmmansiamthin pawh chhunzawm nise meeting chuan a ti bawk a. A endik hna thawk turin tlawmngai pawl NGO hrang hrang a ruat nghal bawk a. Aizawl District chu MUP, Champhai chu NSS, Kolasib chu GNM, Lunglei chu STAM, Mamit chu CYMA, Saiha chu SENVA, Lawngtlai chu AMFU leh Serchhip chu ASEP te chu ruat an ni.

Ram tihkan pawizia leh kangmei chhuak thei laka a venna pawimawhzia zau thei ang bera tlangaupui chhunzawm tha meeting chuan tiin, YMA Group Conference neih thinah awareness campaign neiha, heta tana tul leh mamawh turte chu E&F deptt in bultum se an ti bawk a ni.

Meeting chuan kumina Fire Prevention Week atan nikumah thupui hman ‘ Ram Tikangtu chu Ram Hmelma a ni’ chu hman leh nise a ti a. Mizoram hi India rama kawngmei venna kawnga ‘Fire Mascot’ nei hmasa ber a ni awm a, Mascot hi sakhi note ‘Khitea’ tih a ni. 2016 chhungin lo hal hun bituk zawmlo khua 98 an awm a, Lo/Huan hal hmun 1326 ah awm laiin ram kang hrim hrim hmun 298 lai a awm a. 2009 atanga nikum thleng khan lo hal vanga kang leh kang vanga nuna chan mi 14 an awm tawh bawk a ni.

Ram kang hrim hrim hi Sawrkar Laipuiin pawhin tunhnai khan ngaipawimawhin hemi chungchang hi National Disaster Management Authority (NDMA) pawh hma la turin hrilh a ni a. NDMA hian kaihhruaina dan te siamin state tin te chu Forest Fire Crisis Cell, Forest Fire Crisis Managment Plan te siam turin thurawn a pe a. Chumi zulzuiin Environment, Forests & Climate Change Department chuan hengte hi duang felin Cell pawh hi an din tawh a ni.