Vawiin khan CZ, Higher Secondary School leh Diakkawn High School, Kolasib-ah SVEEP (Systematic Voters & Electoral Participation) chungchangah "Empowering Young and Future Voters Education" tih thupui hmangin election chungchang leh vote neih hlutna leh thlak a pawimawh zia inzirtirna neih a ni.
He hunah hian District Bawrhsap Pu H.Lalengmawia chuan zirlai te chu rualelna rilru pu chunga an zirlai tha taka zir tur a fuihin, thiamna tak tak nei thei tura lehkha chhiar tam turin a fuih a. Ram inrelbawl dan leh kalphung te ralkhat thlir mai lovin zirlaiten kan hre ve tur a ni a ti a. Zirlaiten ram hruaitu leh ram politics te kan hriatchian a, ngaihdan mumal tak kan put a pawimawh a ni a ti a. Inthlang ram kan nih angin ram hruaitu atan mi tha thlan an nih theih nan, zirlai vote nei te inthiarfihlim mai lova thil chinchang chhui a, vote thlak ve ngei turin a sawm a ni.
He hunah hian Pu Mark Lalthanliana, Election Officer, Kolasib pawh telin, Vote thlak dan kalphung te inhrilhriatna hun neih a ni.
SVEEP chungchang inzirtirna hi naktuk lamah chhunzawm leh a ni anga, St.John HSS, HT High School leh Kolasib High School-ah te neih chhunzawm a ni ang.
