280/2023-2024

Dated Serchhip, the 2nd May, 2023: Nimin khan Pu TJ Lalnuntluanga, Minister, Environment, Forest & Climate Change, Law & Judicial, etc., chuan Thenzawl Forest Division huam chhunga awm Sailam Ecological Conservation Society te enkawl Sailam Bird Sanctuary leh Nagar Van Yojana Scheme (City Forest) kalpui nana ruahmanna siam mek, Serchhip Sub Headquarters YMA te enkawl Serchhip dai Entlang Community Forest te a tlawh a, tukin zing khan N. Vanlaiphai Forest Division huam chhunga ramngaw humhalh kawnga hma la tha Branch YMA 12 hruaitute nen inkawmna an nei bawk.

Sailam Bird Sanctuary a tlawhnaah hian Minister chuan, Sailam khaw mipuiten kum 2015 atanga an lo enkawl tawh Sailam Bird Sanctuary chu a hluin a ropui hle a ni, a ti a. Sailam khawtlang hmalakna hi a entawn tlak a, khaw dangte pawhin hetiang tih nachang hi hre zel se a duh tak zet tih a sawi. Sailam in Eco-Tourism leh Botanical Garden lama theihna leh hmunhma an neihte ramngaw tichhe si lova haichhuah thiam a tha hle tih hrilhin hemi kawnga hma la turin sawrkar pawh a inpeih reng a ni, a ti bawk. Sailam Bird Sanctuary enkawl zuina atan leh tihchangtlun zel nan Minister hian Compensatory Afforestation Management & Planning Authority (CAMPA) Fund atangin cheng nuai ruk (Rs. 600,000) a hlan nghal a ni.

He mi hnu hian Serchhip Sub Headquarters YMA in hun rei tak an lo enkawl tawh Entlang Ramngaw (Entlang Social Forestry) a tlawh leh a. He hunah hian Pu TJ Lalnuntluanga chuan, Environment & Forest deparment hmalakna hi Department bil pual a ni lova, khawvel mitinte mamawh thil tul tak a ni. Chutiang taka hlu a nih avang chuan India sawrkar pawhin khawpui chhungah ngeia Ngaw siam, Nagar Van Project (City Forest) a kalpui ta hial a. Entlang ngaw pawh hi Serchhip khawpui huam chhunga awm anih angin he project kalpui nan ruahmanna (proposal) thehluh mek a ni, a ti. Kan hriat thin angin khawvelin boruak thianghlim a nei zel theih nan Carbon Credit a kalpui thin a. Ramngaw nei thaten sum tam tak hai luh theihna remchang an nei thin. Hei hi Mizoram pawhin kalpui dan tur kan dap mek a, kan hlawhtlin ngei ka beisei, a ti bawk. Hmasawnna hnathawhte hian kan ramngawte a tihchhiat thin avang leh hmasawnna hi kan mamawh em em thil, lo hnawl ngawt chi loh a nih bawk si avangin kan tihchhiat hu ramngaw dang siam thar (Compensatory Afforestation) hna thiam taka kan kalpui a ngai a, chumi atan chuan mipuite kan tanrual thiam a tul hle. Hmasawnna hnathawktute pawhin ramngaw humhalhna dan kan neihte tha taka kan zawm a tul bawk a, kan zawm loh avanga dan anga hma kan lakin Forest department lam han dem leh mai a awl thin a ni, tiin hmasawnna hnathawktu Company ten ramngaw humhalhna dan zawm tha se a duh thu a tarlang bawk. Minister hian Mizoramah ramngaw leh tuihna humhalhna lama hmalakna lian tak Japan International Cooperation Agency (JICA) Project hmanga kalpui an tum thu pawh tarlangin, he project hmang hian tuihna humhalh leh tihpun te, Botanical Garden tha tak tak siamte leh hetiang lam chi hmalakna hrang hrang kalpui tum a ni a. A project cost pawh Rs. 525 Crore zet a ni dawn a ni. Japan lamin min pawmpui tawh a, Central sawrkar lam pawhin min pawmpui tawh bakah Mizoram sawrkar pawhin min pawmpui tawh bawk a, nakkum March thlaah Agreement fel fai tak kan neih hman kan beisei a ni, a ti bawk. Minister hian Compensatory Afforestation Management & Planning Authority (CAMPA) Fund atangin Entlang Forestry enkawl zelna tur cheng nuai thum (Rs. 300,000) a hlan a ni.

Minister hi Serchhip Sub-Headquarters YMA President Pu Kawlthuama leh a thawhpuiten an lo dawngsawng a. Pu Kawlthuama chuan, he Social Forestry kan tih hmun hi YMA ten kum 1983 atangin kan enkawl tawh a, tun hi Forest Minister meuhvin a hmun tlawha min hmuhpui tum khatna a ni a, kan lawm tak zet a ni, tiin Minister chungah lawmthu a sawi a ni. Pu Lalbiakchama Chawngthu, DFO, Thenzawl pawhin thusawiin, Serchhip khawpui kiangah ramngaw tha tak mai a awm chu thil lawmawm tak a ni, a ti a. Serchhip mipuiten hun rei tak duat taka an lo enkawl thin hmun hi a hluin a zahawm em em a ni, a ti.

Entlang community forest hi tunhma Serchhip khua VC pakhat hnuaia a awmlai chuan Village Reserve Forest tih a ni a, kum 1983 atang khan YMA kutah hlan niin Social Forestry tih a ni a, Serchhip Branch YMA in enkawl ta a, 1993 atangin Joint YMA anga enkawl a ni leh a 2008 atangin Sub- Headquarters YMA anga kutken zui leh a ni. An kuta a awm atangin YMA hian viltu bik tur thawktu an ruai nghal a, vawiin thlengin an la ruai a, a zau zawng hi Hectare 100 a ni. He hmunah hi Research beitu zirlai engemawzatin an zirbingna behchhanah an rawn hmang tawh thin a, Thing leh Mau upa tawh tak takte bakah ramsa leh sava chi hrang hrangte an awm a ni.

Pu TJ Lalnuntluanga hian tukin zing khan N. Vanlaiphai DFO Pisaah N. Vanlaiphai Forest Division huam chhunga ramngaw humhalh tha Branch YMA sawmpahnih (12) hruaitute nen inkawm hona an nei leh a. He hunah hian Minister chuan, mihringten kan nunna atana kan mamawh ramngaw tha taka an lo enkawl thinnaah lawmthu hrilhin lo uar deuh deuh turin a chah a, Forest Departmen hmalakna tha taka lo tawiawm zel turin a sawm a ni. Minister hian Branch YMA 12 te hi an ramngaw humhalhte an lo enkawl zui zel nan cheng singsarih sangnga (Rs. 75000) theuh a hlan a ni.

Attachment

  • Loading attachment...