Vawiin khan Environment & Forest Minister Pu Lalrinmawia Ralte chuan Art&Culture Auditorium, Berawtlang ah Mizoram Secretariat Service Association(MSSA) inkhawmpui lian vawi 12-na a hmanpui. Naktuk, Zirtawpni hian a hmun ngaiah MSSA member te chuan intuaithar leh nan workshop an buatsaih chhunzawm nghal a ni.

MSSA member te pawimawhna tarlangin Environment & Forest Minister Pu Lalrinmawia Ralte chuan Sawrkar Pisa lianber enkawltu, Secretariat hnathawkte chu sawrkar thluakbur leh a fawng vuantute an ni a ti a. Sawrkarin hna chak taka a thawh theihnan MSSA member ten chanvo leh mawhphurhna pawimawh tak an nei a ti. “Sawrkar hnathawk zingah mahni thawhna department changtu Minister thurawn pe tha duh silo, Minister chetchhiatna a fiamthu lo thawh leh mai te an awm thin a; chutiang mi chuan amah a intih mualpho bakah a hnathawh pawh a zahlo a ni”, a ti. Secretariat staff-te, a hniamber atanga a sangber te inkara thawhhona a tha tih chu pawnlammi te hmuh dan a nih thu Minister chuan a sawi a. Mizoram state a rawn thawk thin, hnamdangmi officer-te leh state pawnlammi ten Mizoram-ah sawrkar hnathawk leh a dawrtu mipui inkarah thamna chelek lai leh eiruk-hlemhletna thil hmuhtur an nei lo tih an sawifo thin thu leh lawmawm a tih thu a tarlang a. File kalkawng thui thin lutuk pawh tawi dan ngaihtuah chhuah ni se; Office kalphung tha zawk nia an hriat te pawh Minister te hrilhhriat thin tur leh finchhuah nachang hre turin MSSA te chu a chah a ni.

MSSA General Conference hi session 2 ah then a ni a. A hmasa zawk, Plenary session hi Pu Lalrammawia, Addl.Secretary& Sr.Vice President, MSSA chuan kaihruaiin Session hnuhnung zawk hi Pi Sailuti, Vice president, MSSA in a kaihruai thung.