No.820/2021-2022

Aizawl the 5th June, 2021 : Vawiin khan World Environment Day pualin Mizoram University chuan webinar a buatsaih a, Environment, Forest & Climate Change Department Minister Pu T.J Lalnuntluanga chuan he hun hi PCCF Conference Hall atangin a hmanpui.

Minister chuan hripui leng karah vawiin ni hun duhawm tak khawvel dang ruala kan hmang ve thei chu lawmawm a tih thu sawiin, MZU Professor ten duhsak taka World Environment Day programme-a an sawm chu lawmawm a ti tak zet a. Kum 2021 a World Environment Day thupui ‘Ecosystem Restoration’ hrerengin kan ram boruak sik leh sa, nuam tak hi hmasawnna kawng hrang hrang a ke kan pen naah hian kan ti chhe tur a ni lo tih hre reng turin mitin te a chah a. India khua leh tui kan nihna angin ram danpui (constitution)-in tih tur min phut zingah chuan kan ramngaw leh a chhunga cheng nunphung hi kan dimdawiin kan humhalh tlat tur a ni tih i hre thar leh theuh ang u tiin, he world environment day ah hian mahni theuh inbihchiang ila, engkim kan tih hi ram leh hnam tan a ni tih i hre thar leh ang u tiin a sawi. Minister chuan ramngaw humhalh leh vawnhim hi mitin mawhphurhna a ni tih hria ila, thing phun chungchangah pawh phundan awmze neia kalpui a tul zia sawiin, phun tam satliah aiin awmze nei taka phun chuan ecosystem venhimnaah kawng ro a su zawk ang tiin a sawi a, hemi kawngah hian MZU-a Forestry Department leh Environmental Science Department-a thawktu zawng zawngte chu thawhho pui-ah leh thurawn pe zel turin a sawm bawk a ni.

Prof. Lalnundanga, Registrar, MZU chuan webinar chhimtu zawng zawng lo lawmin, Prof. J.K Patnaik, Pro-Vice Chancellor, Mizoram chuan World Environment Theme Keynote address a sawi a, he hunah hian Indian Institute of Remote Sensing, Dehradun leh NEHU atanga Professor te thusawi ngaihtlak a ni bawk a ni.