Vawiin khan Ailawngah ‘Community based Environment Conservation & Ecotourism Development Project’ lungphum chu EF&CC Minister Pu TJ Lalnuntluanga chuan a phum a. Hemi zawh hian Khuangchera Hall, Ailawngah project puala programme neih chhunzawm a ni a. Ailawng Village Ecotourism Development Society (AVEDSOC) buatsaih a ni.

Minister chuan thing leh mau humhalh a, khualzinte hip turin project tha tak kalpui a ni tur chu lawmawm a tih thu sawiin Ailawng khaw mipuite pawhin an hlawkpui ngei a beisei thu a sawi a. Ailawng khua tan hmasawnna rahbi kaina a nih thu sawiin nungcha leh ram humhalh kawngah pawh hmasawnna duhawm tak a nih tur thu a sawi a. Sawrkar laipui pawhin ecotourism a ngai pawimawh hle a ni tiin Aizawl atanga darkar 1 lek kalah intihlimna hmun tha tak a awm tur chu khawpui mite tan pawh a tangkai hle dawn a ni, a ti a. Awlsam taka sum dawn tumna rilru kan neih thin hi kan hawisan a ngai a ni tiin sum ruahmansa dik taka hman a nih theih nan mipuiten mawhphurhna sang tak kan nei a ni , a ti a.  Khawtlang hruaitute chu thawhhona tha nei turin a sawm a. Project hlawhtling taka kalpui a nih theih nan duhsakna a hlan nghal a ni.

AVEDSOC hi August Ni 19, 2017 khan din niin a thil tum thenkhatte chu- Ailawng khuain tlawhpawh tur a neihte khualzin tana tlawh chakawm tura hmalak, Ailawng ram huamchhunga nungcha leh ramngawte humhalh, ecotourism kaltlanga Ailawng khua leh tuite hnena eizawnna tlak kawng dap sak, hnam ziarang chawisanna kawnga hmalak an ni.

Project atan hian cheng nuai 100 ruahman niin AVEDSOC LEH MISTIC (Mizoram Science, Technology & Innovation Council) tangkawpin an kalpui dawn a. Anni bakah hian mi thiam tak tak biakrawn tur (consultant) an awm bawk a. Project-in a tum ber chu khualzinte a tam thei ang ber hip leh Ailawng khaw mipuiten project hmanga eizawnna an neih theihna tura hmalak a ni a. Project hi phase hnihah then niin phase 1-na atan hian cheng nuai 65.34 pekchhuah a ni a. Phase 1 hnuaiah hian Khuangchera Memorial Stone cheithat te, khualzinte tana tangkai tur-café leh gallery (khawthlirna) siam te, Dilzawl siamthat te, chawlhna hmun leh parking space sak te, trekking-na tur kalkawng siam te, orchid park te leh cable foot bridge sak te a tel a ni. Phase 2 atan hian cheng nuai 34.66 dah niin building awmsa cheithat te, AVEDSOC member tana training buatsaihna atan te hman tura ruahman a ni.

Programme hi AVEDSOC Chairman leh VCP ni bawk Pu Lalthlamuana chuan a kaihruai a. AVEDSOC Secy Pu R. Lallawmsanga atangin report ngaihthlak a ni a. MISTIC Sr. Scientific Officer Pu Samuel Lalmalsawma chuan project chungchang report a pe a. AVEDSOC Consultant member Dr. John Zothanzama atangin thusawi ngaihthlak a ni a. Ailawng khawltlang hruaitute leh zirlaite an tel kim hle a ni.