19/2023-2024

Kolasib dated 3rd April 2023: Vawiin khan Pu TJ Lalnuntluanga, Minister, Environment, Forest & Climate Change Department chuan Conservator of Forest, Northern Circle Office leh Quarters, Project Veng, Kolasibah a hawng a. Hemi rual hian Extension of Forest Rest House, Bairabi a hawng nghal bawk a ni. He hun ah hian Pu RK Singh, IFS, Principal Chief Conservator of Forest, DFO, Mamit leh Kawrthah, khawtlang hruaitute leh EF&CC department, Kolasiba thawktute an tel a ni.

Pu TJ Lalnuntluanga, Minister, Environment, Forest & Climate Change chuan Department hmalakna thuam chak lehzual nana Conservator of forest, Northern Circle pisa pawimawh tak, Quarters leh Conference Hall-te hawn theih a buatsaih a ni chu lawmawm a tih thu sawiin EF&CC department a thawktute leh Department dang leh khawtlang ten an hlutpui zia lantir nan a hawnna hun a an telpui chu lawmawm a tih thu a sawi. Forest Minister chuan mizo thalai zingah Social media hman sualna a tam thu sawiin midangte hlawhtlinna leh hmalakna chawh phur leh lawmpui aia seltu leh deusawh zawnga thuziah hmuh tur a tam thu a sawi a. A chhe lai haichhuaktu leh seltu mai ni lovin siamtha tura a tak a thawkchhuaktu nih a pawimawh thu a sawi a, ram leh hnam hmasawn nan mahni hma zawn a mawhphurna awm te hlen chhuak tura a tak a thawhchhuah a hun tak zet thu a sawi.

Minister Pu TJ Lalnuntluanga chuan ram leilung humhalhna turin EF & CC department chuan dan hrang hrang a kenkawh thin thu a sawi a. Dan bawhchhia te chunga hremna lekkawh a ngaih thin thu sawiin dan hnuai a phalna nei te, zawm tur ang tha tak a zawm te tan harsatna a awm ngai loh thu a sawi a. Chhuan lo la awm leh zel tur te tan ram leilung hausakna humhalh chu mi tin mawhphurhna a nih thu a sawi.

Mizoram chhung a Forest Division 5-ah Green India Mission kalpui mek a nih thu Minister chuan tarlangin Forest Division zawng zawngah kalpui a nih theih nan hmalak mek a nih thu a sawi a. Hemi hnuai ah hian huan nghet nei tur a thei huan siamtute țanpuina tur ruahmanna a awm bawk thu a sawi.

Pu TJ Lalnuntluanga chuan ram ngaw leh nungcha hlutna inzirtir nan Aizawl Zoological Park pawh tihchangtlun mek zel a nih thu sawiin Nandankanan Zoo atangin sakei pahnih chhah luh a nih thu leh ni 15 dahhran (Quarantine) hnu ah sahuan ah mipui hmuh theihin a awm tur thu a sawi. Ram ngaw humhalh nana Nagar Van Scheme hnuai a ruahmanna te, CAMPA hnuai a hmalakna leh tuihna humhalhna tur a JICA nen ruahmanna siam mek a nih thu Forest Minister hian a tarlang bawk a ni.

Pi Margaret Lalramchhani, IFS, DFO, Kolasib tarlan danin kum 1984 July thla khan Mizoram a Forest Division awm zawng zawng chu Directorate hnuai a awm an ni a. Kum 1984 July ni 13 khan Conservator of Forest (Northern Circle) hi siam niin a thuthmun (Hqrs) atan Aizawl ruat a ni. Chumi rual chuan Director of Forest post chu Conservator of Forest (Southern Circle) post a siam rem niin a thuthmun ah Lunglei ruat a ni. Conservator of Forest (Northern Circle) office chu 1985 November ni 19 khan Aizawlah kalpui tanin December ni 13 khan Conservator of Forest (Southern Circle) office pawh Lungleiah kalpui ve nghal a ni. Conservator of Forest (Northern Circle) hnuai ah hian Division paruk a awm thin a, chungte chu – Aizawl, Champhai, Mamit, Kawrthah, Kolasib leh Darlawn Forest Division-te an ni a kum 1991-a Division hawn thar, Thenzawl Forest Division pawh a tel nghal a ni. July 3, 2003 khan Conservator of Forest (Central Circle) chu CF(Northern Circle) atang a indangin Kolasib, Darlawn leh Kawrthah te a bial a, kum 2010 August ni 13 khan Central Circle hnuaia awm Mamit Division chu Northern Circle hnuaiah behtir a ni bawk.

November 10, 2014 khan CF(Northern Circle) Hqrs chu Aizawl atanga Kolasib a sawn phalna chhuah niin hma lak nghal a ni a. Chung hmalakna avang chuan vawiin hian Cheng nuai 30 seng a sak Office of the Conservator of Forest, Northern Circle, Cheng nuai 20 seng a sak Conservator of Forest Quarters leh Cheng nuai 20 seng a sak Conference Hall-te hawn a ni.