514/2022-2023
Champhai, the 17th May, 2022: Lei hipna tha (gravity scheme) hmanga Dilkawn khua chawm tur tuilakna, Jal Jeevan Misson (JJM) 2020-2021 sum cheng nuai 93.50 (nuai sawmkua pathum leh singnga) senga siam, Dilkawn Water Supply Scheme leh khawchhung in tina tui connection pekna Functional Household Tap Connection (FHTC), cheng nuai 25.07 (nuai sawmhnih panga leh sangsarih) senga siam chu vawiin chawhnu dar 1:00 khan Environment Forest & Climate Change (EF&CC) Minister Pu T.J. Lalnuntluanga'n a hawng.

Hawnna puala Dilkawn Community Hall-a inkhawm buatsaihah Khuallian Pu T.J. Lalnuntluanga chuan Dilkawn khuain tuilakna tha tak a nei thar chu thinlung taka a lawmpui thu leh a tihlawhtlingtu PHE Minister, Department thawktu leh khawtlang mipuite chungah lawmthu a sawi a. Tuilakna siam kawngah khawtlang mipuiten neitu rilru an put theih nana tihtur bituk tel a ni leh mipuiten tha an thawh chu lawmawm a tih thu sawiin, mipuite chu neitu nihna rilru pu tlat tur leh a enkawlzui kawngah tha taka an mawhphurhnate hlen thin turin a chah a ni.

Forest Minister chuan tuihna humhalh leh tihpun tinzawnin kuminah Green Mizoram Day hman tum a nih thu pawh sawiin, tuihna humhalh a tulzia mipui zirtir nan tuilakna lui kam remchangahte Green Mizoram Day hman tuma ruahmanna siam a ni, a ti a. PHE leh Forest Department-te chu inhnimhnai leh tangtlang tlat tur an nih thu sawiin, mipuite nen tanghova neitu thinlung pu chunga thawhho a ngaih thu a sawi a. Mipuite chu a eng zawnga ngaihtuahna pu tlat tur leh rilru leh ngaihtuahna hrisel nei tura a duh thu sawiin, ram leh hnam hmasawn zawk, kum sangbi tel chanchin chhui tur neite nena inkhaikhina rilru hnual mai lova, dai chin atanga hmasawn zel tura ngaihtuahna seng zawk thin turin a chah a. Dilkawn khuaa hmasawnna ruhrel siam thar hawn tak chu a khaw miten tangkai taka an hman theih nan leh beiseina thar, a eng zawnga thil thlir nana an hman duhsakin a hawng a ni.

District Bawrhsap Pu James Lalrinchhana, Chairman, District Water & Sanitation Committee chuan Dilkawn khuain tuilakna leh in tina tui herhhaw mai theihna an nei thei ta chu a lawmpui thu a sawi a. Tui hnianghnar tak neih chuan ei leh in mai bakah, thianghlimna, faina, hriselna leh eibar dehchhuah thlengin a nghawng a ni, a ti a. Hripui leng kara PHE Department-in tuilakna chhawrnahawm tak tak an peihfel thei chu fakawm tiin, thawhhona tha tak hnuaiah department leh khawtlangin hma an la ho thin chu chhuanawm a tih thu a sawi bawk.

Tuihnate vawnhim zel a nih theih nan ramngaw humhalh a tul thu sawiin, khawtlang mipuite theihtawp chhuah zel turin a chah bawk a. District mipuite chu rualelna chang hriaa District tihhmasawn kawnga theihtawp chhuah puiah a sawm a. Hrilengin ziaawm lam a pan zel leh Champhai District-ah hri vei an awm rih ta lo awm chu vanneihthlak a tih thu sawiin, District mipuite chu fimkhur taka nunphung pangngai bahlah lova khawsa zel turin a chah bawk a ni.

Hawnna pual inkhawm buatsaih hi Er. C. Lalhmachhuana, SE, Champhai WATSAN Circle chuan a kaihruai a. Upa HC Lalropuia'n hunserh a hmang a, Er. Vanlalmuanawma, SDO, Champhai Project Sub-Division-in technical report a pe a. DFO Champhai Pu Lalduhthlana hnen atangin tuihna humhalh kawnga tulte ngaihthlak a ni a. Er. ZD. Dengthuama, EE, Champhai WATSAN Division-in thu a sawi bawk a. Dilkawn VCP Pu Lalbetluanga, Chairman, Village Water & Sanitation Committee-in lawmthu sawiin hun a khar a ni.

Dilkawn Water Supply Scheme hi May ni 20, 2020 khan thawh tan a ni a, December ni 13, 2021 khan thawh zawh a ni. Tun thlengin tui connection hi in 212 ah pek a ni a. A siam nan hian Sawrkar laipuiin senso za zela 90 tumin State sawrkarin za zela 10 a tum thung a, a puitlin theih nan hian khawtlang mipuiten cheng nuaikhat leh singnga hu tha an thawh bawk a ni.

Mi pakhatin nikhatah tui litre 55 thleng hmang anga chhutin mi 1505 te kum 2050 thleng chawmzo tura duan a ni a. Tuilakna Lengkir lui atang hian chhuk zawnga tuilak niin, tuilakna thui zawng hi metre 2,300/ kilometre 2.3 a ni a. Tuilakna Lengkir lui leh khaw lu-a tuizem lian litre nuai 3 dawng insanhleihna hi metre 70 a ni. Nitin darkar 24 chhung tui haw thei tur leh tui litre 82,775 (singriat sanghnih zasarih sawmsarih leh panga) thlenga haw thei tura duan a ni. Tuilakna pipe hi 50 mm diameter GI (M) pipe niin, Horizontal Roughing Filtration (HRF) hmanga thlitfim a nih hnuah tuizem lian litre 1,00,000 (nuai khat) dawngah chhungluh a ni a. Heta tang hian 80 mm GI pipe hmanga lakchhuah leh niin, Dead End/Tree System hmangin khawchhung in tinah tui connection (Functional Household Tap Connection) pek chhuah leh a ni.