513/2022-2023
Aizawl, the 17th May 2022: Makeshift Covid Care Centre, PHC Aibawk chu vawiin khan Aizawl Bawrhsap Dr. Lalhriatzuali Ralte in a hawng a, Health & Family Welfare Department hnenah a hlan nghal a ni. Makeshift Covid Care Centre hi Central Warehousing Corporation in Corporate Social Responsibility hnuaia cheng nuai 20 senga sak a ni.

Dr. Lalhriatzuali Ralte chuan thu sawiin Makeshift Covid Care Centre dinna atana tha seng zawng zawng te chungah lawmthu a sawi a, thawhhona tha avanga hlawhtlinna lo awm a ni, a ti a. Funding pe tu Central Warehousing Corporation chungah lawmthu sawi bawkin, CMO Aizawl West Dr Thani Pachuau chungah a bikin lawmthu a sawi bawk a. He building hi Covid natna awm tawh loh hnuah pawh Health & Family Welfare Department in tangkai taka natna inkai chhawn awlsam (infectious disease) enkawl nan - Isolation Ward atana hman theih nghal tura ruahman a nih thu a sawi a. Khawtlang tana thahnemngai taka thawktu leh Primary Health Centre a thawktute zawng zawng chungah lawmthu sawiin, PHC Aibawk hi thang zel se, vawiin hi a bul tanna atan ni se tiin duhsakna hlanin, theihtawp chhuah turin thawktute a sawm a ni.

He hunah hian PHC Aibawk chu damdawi in tha leh fel fai lawmman, Kayakalp Award 2020-21, 2021-22 first prize cheng nuai 2 ve ve leh citation hlan nghal a ni.

Makeshift Covid Care Centre hi a sei zawng feet 47 a ni a, a vang feet 17 a ni a, chhawnghnih niin, damlo mi 40 vel leng thei a ni.

He hun hi BDO Aibawk Pu Chinlianmanga'n kaihruaiin, Additional Deputy Commissioner Pi K.Vanlalruati hnen atangin project work report ngaihthlak a ni a, Additional Deputy Commissioner Pu R. Vanrengpuia'n lawmthu sawiin he hun hi a khar a ni.