Environment, Forest & Climate Change Minister Pu Lalrinmawia Ralte chuan vawiin khan Zo-hnahthlak hnam peng hrang hrangte in unauna leh pumkhatna tha zawk neihna tura MZP in a buatsaih ZOFEST vawi 6-na chu Zokhawthar-ah khuallian niin a hawng.

Minister chuan ram inrelbawlna in a nghawng, Zo-hnahthlak tlang hrang hranga in beng bel tawhte lungrual taka huang khata lawiza hun tur hi ramtina Zofate nghak fak anih thu a sawi a. Zo-hnahthlak, hnam hrang hrang, thlahtu chi khat kan nihna tichhe theitu leh min telkhawmtu pawimawh ber unauna leh pumkhatna tichhe theitu chu inlungrual lohna anih thu sawiin, Zohnahthlakte Inkhawmpui, he Zofest hi lungrualna tlanga min hlangtu leh a chhelai siamthatu ni thei se a duh thu a sawi ni.

ZOFEST hi kum 2002 atang khan tum 5 buatsaih tawh niin, a vawi khat na chu Churachandpur, Manipur-ah neih a ni a, Aizawl-ah vawi thum neih ni leh in, a tum 5-na chu Darchawi, Tripura State-ah neih a ni.

Vawiin chawhma Zofest hawnna inkhawm hi MZP General Hqrs. President Pu Lalsangzuala Ngente chuan kaihhruaiin, Vice President B. Vanlaltana hnen atanga thusawi ngaihthlak anih bakah ZOFEST Organising Committee Secretary L. Ramdinliana hnen atangin report ngaihthlak a ni a. Chawhnu lamah Seminar leh Variety Programme hmanzui a ni a. MZP General Hqrs. Finance Secretary Michael Zonuntluanga kaihhruaina hnuaiah Zo-hnahthlak hnam hrang hrang atangin ZOFEST chibai bukna leh Chin Literature & Culture Association buatsaih ZOFEST Music Video tlangzarhna hun hman anih bakah IFS (Rtd) Pu L. Keivom chuan thu a sawi bawk.