3115/2023-2024

Aizawl, the 19th December, 2023: Vawiin khan Environment, Forests & Climate Change (EF&CC) Minister Pu Lalthansanga chuan Chief Wildlife Warden Conference Hall, MINECO ah EF&CC Department hotute meeting a neihpui a. He meeting-ah hian Forest Department hmalakna kal mekte leh Department tana ngaihpawimawh tulte sawi ho a ni.

EF&CC Minister Pu Lalthansanga chuan Department hotute chu hmasawnna tura tulte ngaihven tur leh kaldan phung tha zawk nei tura ngaihtuahna thar seng turin a chah a. Sawrkar tharin corruption awm lohna State-a Mizoram siam tuma hma a lak thu sawiin, Forest Department hotute chu corruption laka fihlim tum turin a chah a. Mipui sawrkar din tura sawrkarin ke a penna kawngah Department hotute chu zoram mipuite hmakhua tur ngaihtuah chunga kalkawng dika kal tura pui turin a ngen nghal bawk.

Vawiin meeting-ah hian EF&CC Department-in Centrally Sponsored Scheme (CSS) leh Scheme dang a kalpui hrang hrangte bakah Department-in harsatna a tawhte Pu R.S Sinha, Principal Secretary & PCCF, EF&CC Department chuan Power Point Presentation hmangin a sawifiah a. Divisional Forest Officer (DFO) hrang hrangte'n an Division chhung theuha hmalakna leh harsatna tawhte Minister bulah hian an thlen bawk a ni.

He meeting-ah hian development project atana forest ram mamawh a awm changa forest clearance dil a ngaihdan leh dil dan turte pawh sawi ho a ni a. Development Project a awm dawn reng rengin forest ram tihchhiat a nih dawn chuan Forest (Conservation) Act, 1980 Dan in a phut angin a changtu Department leh Agency ten Forest Clearance PARIVESH Portal-ah dil thin se, hemi tur hian department hrang hrang hnenah hriattirna leh ngenna thlen ni se tih a ni bawk.