Vawiin khan Forest Minister Pu TJ Lalnuntluanga leh Pu C.Lalramzauva, Adviser to Chief Minister te chuan Tamdil an tlawh.

Pu TJ Lalnuntluanga chuan Tamdil chu Mizote nuna hmun pawimawh tak a nih avangin Saitual District thar enkawlna hnuaiah Tamdil chuan Mizoram chhung hmun hrang hrang leh ram pawn atang pawha khualzin tlawhtu tam zawk nei tura buatsaih a nih thuai a beisei thu a sawi a. tamdil enkawl dan chungchang pawh enfiah tul thu a sawiin, Tamdil tlawhtu khualzinte atangin Saitual leh a chhehvel khuate pawhin sum lakluhna hnar an nei thei a ni a ti. Mizoram chhung hmun tam taka miten hahdam taka chhungkua leh thianhova chawlh an hman theihna hmun atana remchang a nihna chuan Tamdil hlutna hi a ti zual hle a ni, a ti bawk. Forest Department chu department hautak lo tak, a hmalakna te leh enkawl zuina reng reng hi Central a?anga puihna hi a tam zawk a ni tih a sawi.

Pu C.Lalramzauva pawhin tamdil chu mumal zawka chei theih a nih thu sawiin, a tlawhtute tana remchang zawk turin a vel kal kawng leh a chunglam atanga thlir theihna tur lei dawh chu thil tul tak a ni tih a sawi a. Tamdil chhehvel humhalh kawngah pawh ruahmanna felfai zawk neih a pawimawh thu a sawi a, tamdil ram velah kum 30 vel kal taah ramsa an la tam em em thin a, ramngawte thiah a nih zel avanga ramsa leh nungcha hmuh tur an awm tawh lo chu pawi a tih thu a sawi. Ramngaw, lei tha leh nungchate humhalhna tura Environment & Forests Department-in Tamdil Wetland a buatsaih chu lawmawm a tih thu leh, thalaite tan mai ni lo, nu leh pa, kum lama upa zawkte tan intihhlimna leh chawlh hahdamna hmun tha tak siam a nih thuai a beisei thu a sawi.

Tamdil-ah hian Forest, Tourism leh Fisheries Department ten hmalakna an kalpui mek a. Fisheries enkawl 'Fish Hatchery' dah a ni a, Tourism lamin thlenna tur Cottage neiin Forest department hian mikhual thlenna tur bakah a dil enkawl leh a tlawhtute tana hman tur Lawngleng an nei bawk.

Tamdil hmuna Fish hatchery-ah hian sangha chi nuai ruk thleng dah theihna nursery 15, sq.metre 2000-a zau a awm a, rearing tank 6 awmin, tum khatah sangha notê 67,500 a dah theih a ni. Hatchery atang hian kum khatah vawi thumte Sangha note an thar thei tawh mahse chhan hrang hrang vangin hatchery hi a nih tur ang taka chhawr tangkai a ni rih lote pawh Minister chuan ngaihtuah chian a tul a ti bawk.