Dr.K.Beichhua, Hon'ble Minister of State, for AH&Vety,SWD etc. chuan Zyhno Centenary lawmna programme-ah Khuallian niin,   Centenary lawmna programme a hmanpui. Pu KT.Rokhaw Bialtu MLA pawhin khualzahawm niin vawiin programme hi a chhim  ve bawk.

Zyhno khua chuan an Kum 100 tlin lawmna pual hian *Centenary Gate*  khaw luh dawnah an siam a, kawtthler lun lai berah *Centenary Lungphun* an diinin,  *Centenary Souvenir*  changtlung zet an buatsaih a, Ran lu kumin  Ruaipui an buatsaih bawk a ni.

Zyhno khua hi Siaha khawpui atangin  85Km hlaa awm a ni a. Tipa atang chuan  13Km  leka hlaah a awm thung.  NH54 in a paltlang a ni. Tipa khua atanga kal chuan Siaha district khawthlang leh chhak lam kalna hi Zyhno khua atang hian a peng a, khawthlang leh khawchhak lam infinna khua te pawh a ti thei awm e.  British in min awp lai khan  chhimlama khaw pawimawh ber leh lian ber te zing a mi  a ni a. Kum 1951 a India ram census  pawh khan ,  tuna Siaha leh Lawngtlai District huam chhunga khawpui ber a la ni fan.  Tunah pawh hian Siaha District chhunga ram ngaw nei tha ber leh nei zau ber khua an la ni. Tunah hian  In     343 awmin, mi cheng te hi an vaiin 2621 an ni a, Mipa-998 leh hmeichhia-1063 an awm mek a ni.Sex ratio  hi 1065  a ni.

 Minister chuan Centenary lawmnaah thu sawiin; Zyhno Lal  hi  British hnuaia  Chin Hills leh Lushai Hills huam chhunga Lal zawng zawng an tlawm vek lai pawh tlawm lawk lo kha a ni a. British ho  pawhin  Zyhno khua leh tui te hi mi huaisen tih a  ahriat kha in ni. Chuvangin vawiina in Centenary Lawmna thupui a tana *Rinawmna* in hmang pawh hi a inhmeh hle a ni; a ti.  Minister chuan huaisenna hi Rinawmna rahchhuah a ni chawk thin. Rinawmna chuan Taimakna a hringa, taimakna chuan intodelhna a hring leh a, Intodelhna chuan inrintawkna leh huaisenna a hring thin a ni.Riltam chungin a huaisen tak tak thei lo, mi dawizep an rinawm mawh viau thin. Rinawmna rau rau-ah pawh Pathian laka Rinawmna hi a ropui ber, Pathian laka Rinawmna  chuan engkim hi a fel duak  mai a ni, a ti.

Minister chuan sawi zawmin, vawiin Centenary  ropui taka kan lawm leh kan thupui RINAWMNA  hian Zyhno khua leh tui te  rilruah mi huaisen an nih tih hi hriat nawn tir leh se. Chu chuan an  taimakna te, chhelhna te, inlungrualna te chawk tho lehin  kawng engkimah Mara ram ti hmingthatu leh Mara ram in a thlamuanpui khua lo ni leh rawh se, tih hi ka duhsakna a ni, a ti.

 Pu KT.Rokhaw, bialtu MLA pawhin thu sawina hun hmangin, Krismas dawn hun chep tak karah Minister te Nupa in ka bialchhunga Programme min lo hmanpui thei avangin, a mimal tak pawhin lawmthu ka sawi tak zet a ni, a ti.

Vawiin programme-ah hian Pu PP.Thawla, Ex-Minister in Centenary Souvenir  a tlangzarh nghal bawk. Centenary Lawmna programme hi naktuk thlengin an chhunzawm dawn a ni.