No.649/2021-2022

Aizawl, the 24th May 2021 : Vawiin Pu TJ Lalnuntluanga, Minister, Environment, Forests & Climate Change kaihruaina hnuaiah Video conferencing hmangin kum 2020-21 chhunga Environment, Forests & Climate Change (EF&CC) Department hmalaknate thlirletna leh kum kal meka hmalak dan tur hrang hrangte an sawiho.

He meeting-a Chairman, Pu TJ Lalnuntluanga chuan Covid 19 hri leng karah ramngaw humhalh a pawimawh zual zel tih sawiin, ramgaw leh nungcha pawimawhna chu a takin khawvel leh Mizoram ngei pawhin kan tawng chho mek a ni a ti a. Thing phun chu hunbi nei a nih avangin kumin fur tui tlak laia a tam thei ang ber phun a nih theih nan hmalak a tul thu sawiin, ramngaw leh nungcha humhalh chu hrileng avanga inthlahdul theih a ni lo a ti. Thing tiak lian tha chauh kumin Green Mizoram Day-ah chuan phun a nih tur thu a sawiin Pu TJ Lalnuntluanga chuan Covid19 hri leng mek avanga Lockdown kalpui laiin ramhnuaiah mihring kan chevel nasa a, lo neih leh kut hnathawka ei zawngtute chu ramngaw tha suat lo tur leh, nungchate laka zahngai turin a sawm a ni.

Kumin 2021 Green Mizoram Day pawh hripui leng avangin mipui pungkhawm zawnga hman theih a ni dawn lo va. Aizawl District-ah chuan Mizoram College of Nursing (MCON) Complex, Falkawnah thing phun hnatlang nei tura ruahman a ni. He meeting-ah hian Green Mizoram Day-a thingtiak sem chhuah dan tur leh, a enkawl zui dan tur te, Centrally Sponsor Scheme hnuaia project kal mek te thlirhovin, hmachhawp hrang hrangte an sawiho a ni.

He meeting-a chairman, Pu TJ Lalnuntluanga chuan EF&CC Department lehkhabu buatsaih, Mizorama National Park leh Wildlife Sanctuary te chanchin leh thlalak pholanna “Splendid Wildlife habitats of Mizoram” tih, chu a tlangzarh a ni.