977/2023-2024

Champhai, the 29th June, 2023: Ni thum (June 29-July 1, 2023) chhung awh tur pangpar phochhuah leh zawrhna hun, Horti Fair & Flower Show, Horticulture Department leh Champhai District Florist Association-te tangkawp buatsaih chu vawiin chawhma dar 11 khan Environment, Forest & Climate Change Minister Pu T.J. Lalnuntluanga chuan CHANEM Building-ah khuallian niin a hawng.

Khuallian Pu T.J. Lalnuntluanga chuan Horticulture Department leh Champhai District Florist Association-te tangkawpin thawhhona tha tak hnuaiah Horti Fair & Flower Show an buatsaih chu lawmawm tiin, hei hian chona thar leh rah tha tak a chhuah ngei ka beisei a ni, a ti a. Pangpar chu khuarel mawina, sakhuana leh nunphunga nghet taka bet tel tlat a nih thu sawiin, District Florist Association leh Champhai Nature Conservancy te'n Champhai leh a chehhvel cheimawi leh humhalh kawnga thahnemngai taka tha an thawh thin chu fakawm a tih thu a sawi a. Pangpar mawi tak awmna chu hmun nuam leh ngainat hlawh a nih thin thu sawiin, pangpar ngainatute nunah hlimna leh hmangaihnain hmun a chan tam thu a sawi bawk.

EF&CC Minister chuan pangpar khawi chu hlimna mai bakah sum leh pai dehchhuah theihna a nih tel thu pawh sawiin, tun aia nasa a hmalak a nih chuan ram sum leh pai dinhmun thlenga a tih that theih thu a sawi a. Khualhip leh thlen kawnga hmalakna Swadesh Darshan 2.0 hnuaia hmalakna turin Champhai District leh Aizawl District-te thlan a nih thu sawiin, mithiamte'n Champhai tlawha zirchiannate hmun 2-3 velah an rawn neih tawh thu leh an bawhzui mek thu a sawi a, hei hian tourism lamah rah tha a chhuah ngei kan beisei a ni, a ti a. Tun atanga kum 20-30 lo thleng tur thlirin Champhai Zotlang hmunhluiah Botanical Garden, Nature Learning Centre leh Interpretation Centre-te din chhoh mek a nih thu sawiin, hemi lama rawtna leh finchhuah duh neite tan a inhawn reng thu a sawi a. Champhai Horti Fair & Flower Show chuan pangpar leh horti product ngaihsanna leh, tourism chawinung kawngah rah tha a chhuah theih ngei a beisei thu sawiin, a duh apiangte chhim theih turin a hawng a ni.

Khualzahawm District Bawrhsap Pu James Lalrinchhana chuan Horti Fair & Flower Show buatsaih chu District tana hmasawnna peng pawimawh pakhat a nih thu sawiin, Champhai District chu sik leh sa nuam, pipu sulhnu tamna, khualhip thei leh mite ngaihven tak a ni, a ti a. Khualzin mite tana ennawm leh ngaihhlut theih tur zawnga pangpar mawi tak tak hmanga hmunhma cheiin mite a hip nasat thu a sawi bawk a. District mipuite chu khuarel mawinate ngaihlua duat thiam turin a chah a ni.

Champhai Horti Fair & Flower Show 2023 hawnna hun hi Pu B. Lalzarzova, District Horticulture Officer (DHO) Champhai chuan kaihruaiin, Horti Fair & Flower Show chuan loneitute leh pangpar khawitute thil thar chhuah leh hmalaknate pho chhuah mai piah lamah lei theih tura chhawpchhuah sak a tum thu a sawi a. Pi K.Lalthiangi, Asst. Secretary, Champhai District Florist Association (CDFA) chuan report pein hruaitute inhmelhriattirna a nei a. Pu K.Zonunsanga, ADHO in lawmthu sawiin hun hman a khar a ni.

Champhai Flower Show & Fair ah hian Category 4 awmin mi 91 an tel a. He hunah hian Category hrang hrang 4 a tithate hnenah Khuallian leh Khualzahawm te'n lawmman an sem chhuak a. Lawmman dawngtute chu:

A) Flower Arrangement:
1. R. Lalrinzuala, Vengthlang
2. Lalrinsangi, Vengsang
3. Vanlalzuia, Kahrawt

B) Pot Flower:
1. C.Ramengmawii, Vengthlang North
2. Sangpuii, Venglai
3. Lalthlamuani, Kahrawt

C) House Plant:
1. Lalnuntluangi, Kahrawt
2. Lathansangi, Kahrawt
3. Lalrammawii, Kahrawt

D) Bonsai:
1. Lalfakzuala Pachuau, Jail Veng
2. Lalropuii, Vengthlang
3. Thanmawii, Vengsang

Pakhatnain Rs 2,000/-, pahnihna Rs 1,500/- leh pathumnain Rs 1,000/- an dawng a. Heng bakah hian a tel zawng zawngte'n participation prize Rs 500/- an dawng vek dawn a ni.