978/2023-2024

Dated Serchhip, the 29th June, 2023: Vawiin khan Dr R. Lalthangliana, Health Minister chuan Ngentiang Primary Health Centre building thar a hawng a. Er. Lalrinawma, bialtu MLA, Social Welfare & Tibal Affairs Minister ni bawk leh Health Department hotuten an telpui.

Primary Health Centre thar lawmna hun hi Ngentiang Community Hall-ah neih a ni a. He hunah hian Dr R. Lalthangliana chuan, tun kum nga chhungin Community Health Centre sak thar 20 chuang kan lo nei ta a, hawn mai theih tura sak zawh tawh an la awm nual bawk a, kan lawm hle a ni. Ngentiang Primary Health Centre sak thar pawh hi Ngentiang leh a chhehvel mipuiten tangkai taka in lo hman ka beisei. Kan hriat theuh angin kum 2 leh thla 3 chhung vel Covid hripuiin min nuai a, khawvel a buai hle mai a. Sum tam tak sorkarin a hmang ral a. Keini ram pawhin kan pumpelh thei bik lo a nih kha. Hripui vang hian Health Department bikah pawh hna lak tura tihfel tawh tam tak kan la thei ta rih ta lova. Chutichung chuan Mizoram hian Sub Centre 375 kan nei a, Primary Health Centre 61 neiin, Community Health Centre 9 kan nei a; kan Sub Centre zawng zawng te hi Health and Wellness Centre-ah kan hlangkai hman vek ta thova, a ropuiin a chhinchhiah tlak hle a ni. Covid vanga harsatna piah lamah India ram hmun dangin an tawrh loh vawkpul hrite kan tuar a, vawk sing chuang fe an thi a, ramri buai leh Myanmar, Bangladesh leh Manipur aṭanga unaute raltlan te kan theih tawkin kan dawngsawng bawk a. Heti chunga hmasawnna tam tak kawng hrang hranga kalpui zel a ni hi a lawmawmin a mak ka ti hial zawk a ni, a ti bawk.

He hunah hian Er Lalrinawma, bialtu MLA, Social Welfare Minister ni bawk pawhin thu a sawi a. Ngentiang damdawi in building thar hawn a ni ta hi ka lawm tak zet a. Ngentiang leh a chhehvel khuate tan he damdawiin hi a hlu em em a, tunah phei chuan hmunhma tha lehzual nen mipuite tan  hna an thawk dawn a ni a, Sorkar leh Health Minister Dr R Lalthangliana chungah lawmthu ka sawi a ni. Hriselna hi a pawimawh em em a, khawvel sorkar dangte pawh hian inthlana an buaipui leh an zawrh ber chu health care scheme a ni fo ṭhin. Kan bial chhungah Health and Wellness centre hmun 8 lai maia sorkar-in min pe hi a ropuiin kan tan an hlu tak zet a ni. Vawiina kan hawn thar damdawiin neitu dik tak chu mipuite kan ni a, felfai leh duat takin lo enkawl turin ka ngen che u a ni, tiin Ngentiang mipuite a chah bawk.

He PHC building thar hi NABARD (RIDF XXVI 2020-21) fund cheng  266.5 lakhs senga sak a ni a, kum 2021 February atanga sak tan niin chhawng hnih a sang a ni a, tun thla ni 6 khan a sak hna hi zawh fel a ni. A chhawng hnuai zawk (ground floor) zau zawng hi 485.50 sq meter niin hetah hian Male & Female Ward, Clinics, Dressing Room, X-Ray Room, Store Room, Preparation Room, Laboratory, Waiting Area, Minor OT, Casualty, Office, Kitchen leh a dangte an awm a, a chhawng chung zawk zau zawng hi 100sq meter niin Main Centre leh Main Hall te a awm a ni. A satu contractor hi C. Lalrengliana, Aizawl a ni.

A hawnna leh a lawmna inkhawm hi Dr. Chawngthanchhunga, Joint Director, Health Services (M)-in a kaihruai a ni.