1672/2022-2023

Aizawl, the 22nd August, 2022: 

Aizawl, the 22nd August, 2022: Ziaktu Pu C.Lalhluna kutchhuak, 'Mizoram Thing leh Mau, Nungchate Humhalhtu Ropui, VL Bela (The Great Conservator of Flora and Fauna of Mizoram)' tih lehkhabu chu vawiin chawhma dar 11 khan Environment, Forest & Climate Change Minister Pu T.J. Lalnuntluanga chuan MPSOA Conference Hall, CID Complex, Bungkawn, Aizawlah a tlangzarh.

Khuallian Pu T.J. Lalnuntluanga chuan lehkhabu tha leh chhiar manhla tak tak lo ziak tawh thintu Mizote tana rohlu, Pu C.Lalhluna kutchhuak Pu VL Bela chanchin chhiar theiha peihfel a ni ta chu lawmawm tiin, thu mai nilo ziaka dahthat a ni chuan a hlutna a tisang hle thin a ni, a ti a. Lehkhabu ziaktute chu hnam rohlu an ni a, hetianga mi taima leh mithiam kan nei hi a vanneihthlak hle a ni, a ti a. Amah pawh SSU hruaitu a lo nih tawh țhin angin, SSU Founder President lehkhabu ziah tlangzarhtu a ni chu lawmawm a tih thu a sawi bawk a. Lehkhabu hming put chhan Pu VL Bela chu Zoram leh Zofate tana mi thawhhlawk tak leh mi hlu tak, mi tlawmngai, rual pawl thiam leh hawihhawm tak a nih thu sawiin, Mizoramin kan neih hlut ramhmul damdawite pawh hmang tangkai em em thintu a ni, a ti a .Pu T.J. Lalnuntluanga chuan sawi chhunzawmin, Pu VL Bela chu mi entawn tlak, mi taima leh midangte phut hauh lova a hmaa chhuak hna thawk țhin a ni tih sawiin, hmangaihna ngah tak, phârte pawh lungtenna nei hauh lova lo enkawl tawh țhintu a ni, a ti a. Rethei leh chhumchhiate tana a lo luanchhuah tawh țhin dante, nungcha, thing leh mau humhalhna kawnga ke a pen dante pawh chhuanawm a tih thu a tarlang bawk. 

Forest Minister Pu T.J. Lalnuntluanga chuan thing leh mau leh a chhunga cheng ramsate humhalh chu khawvel ram hrang hrangte buaipui lian ber a nih thu sawiin, ngaihtuahna leh rilru hrisel tak pu chunga a taka ram tana pen chhuak ngam hi kan mamawh takzet a ni, a ti a. Thing leh mau humhalh kawnga sulsutu hmasa Pu VL Bela hmalakna hrang hrangte tarlangin, mi ten nachang pawh an la hriat tam hma hauhin Neihdawn leh Chawngtlai khua-ahte ram humhalh bik khaw hruaitute leh NGO te nena tangkawpin an lo siam daih tawh a. Mizoram Consultative Forum (MCU) hruaitu a nih angin kum 2002 daih tawh atang khan thing leh mau leh nungchate humhalh hna ZOTHEIHUAN an kalpui a, Mizoram hnum hrang hrangah an din tawh bawk a ni, a ti a.  'Mizoram Thing leh Mau, Nungchate Humhalhtu Ropui, VL Bela' tih lehkhabu chu chhiartuten hmasawn nan an hman ngei theih nana duhsakna hlanin a tlangzarh a ni. 

He huna thusawitu dang, lehkhabu ziaktu ni bawk Pu C.Lalhluna chuan nungcha, thing leh maute venhimna kawnga Pu VL Bela thawhrimna leh kan ramin remna leh muanna a neih theih nana a thawhhlawk zia țhang thar zawk ten an hriat a duh avanga lehkhabu buatsaih a nih thu a sawi a ni.

Lehkhabu tlangzarhna inkhawm hi Pu Vanlalsawma'n kaihruaiin, Rev. Fr. Caleb Laldawngsanga, Parish Priest, St. Mary's Church chuan hunserh a hmang a. Mizo Academy of Letters Vice-President, Prof. Rualkhuma Colney-in lehkhabu thlirlawkna a nei a. Sawm bikte hnen atangin thusawi tawi ngaihthlak a ni a, lehkhabu hming putu Pu VL  Bela'n lawmthu sawina hun hmangin Rev. Fr. Joseph Lalbiakthanga'n malsawm tawngtainain hun a khar a ni.