1671/2022-2023
Champhai, the 22nd August, 2022: Special Summary Revision of Electoral Roll-2023 atana inpuahchahna kalpui mek zelah District Election Office, Champhai buatsaih nithum awh tur Booth Level Officer (BLO) training chu vawiin chawhma dar 10:00 khan I&PR Auditorium, CHANEM Building Champhaiah neih tan a ni.

He hun hmanpuitu District Election Officer Pu James Lalrinchhana, District Bawrhsap ni bawk chuan BLO te chu Electoral Roll felfai leh tha nei tura hmalatu, ram venghimtu hmasa leh ram hmabak hriltute an nih thu sawiin, election hlawhtlinna chu electoral roll felfai leh felfai lohah a innghah tlat avangin BLO turin mi rinawm leh felfai takte ruat thin an ni, a ti a. An chetdanin election-ah awm ze thui tak a neih avangin, electoral roll-a lut tur dik takte chauh dahluh an nih theih nan huaisen leh rinawm taka an mawhphurhnate hlen chhuah tum turin a fuih a ni.

District Election Officer chuan election kalphung chu siam danglam reng a nih thu leh inzirtir thar ve zel a tul thu a sawi a. Election Commission of India tha tichak tura a bulthuma hmalatu BLO te chu thil tihsual awm lo thei ang bera electoral roll siam tura mawhphurhna sang tak nei an nih thu hrilhin, vote nei thar turte sengkhawma an dikna leh chanvote vawnhim sak tum turin a chah a. ECI duan technology thar ber berte chu awlsam leh zangkhai zawka hnathawhna tur a ni tih hria a, zir thiam zel tum tur leh tangkai taka hman tuma inherrem thiam turin a fuih a, kalphung hriat bel sa duh tawk mai lova hmanraw thar mila hnathawh thiam turin a chah a. Kawng hrang hranga voter-te tanpuitu an ni tih inhre thara puih ngai leh hrilhfiah ngaite tanpui hreh lo turin a chah a. Hriatfiah duh an neihte mithiam zawkte zawh hrehlo tura chahin training hi a hawng a ni.

Training kaihruaitu Election Officer, Pu Lalnunfela Chawngthu chuan election buaipui kawngah thil thar hriattur a awm belh ve zel avangin ngaia neiha kalphung hmasaa innghah mai theih a nih loh thu a sawi a. Kumin August ni 1 atangin Election Commission of India-in election kaihhnawih thil thar a siam thu tarlangin, BLO te chu intuaithar zel tum turin a chah a ni.

Vawiin BLO te pual training-ah hian District Level Master Trainer, Pi Esther Leihang, AERO chuan form thar hrang hrang buaipui dante, Garuda App leh Voters Helpline App hman dante a sawifiah a. Pu J.Lalthanmawia, Data Entry Operator, Election Branch-in Garuda App hman dan a taka entirin zirtirna a pe a ni.

Vawiin BLO Training kaltlang hian Champhai South AC leh East Tuipui AC khaw thenkhata BLO te zirtirna pek an ni a. Ruahman dan chuan naktuk hian Champhai North AC a BLO te tan a hmun ngaiah training hi buatsaih tur niin, naktip hian East Tuipui AC huamchhunga BLO te tan BNRGSK Hall, Khawbungah training buatsaih a ni ang.