2159/2022-2023
Aizawl the 3rd October 2022 : Vawiin khan EF&CC Minister Pu T.J Lalnuntluanga'n 68th National Wildlife Week, 2022 chu Assembly Annexe-ah a hawng.

Khuallian Pu T.J Lalnuntluanga chuan thu sawiin India ram pumah kum tinin hman thin a ni tih sawiin, he National Wildlife Week hian a tum chu ramngaw leh nungcha humhalh kawnga mitinin kan tihtur inhrilhhriatna leh kan lo dam khawchhuah nana nungcha te pawimawhna leh kan chhehvel kan chenna chereu zel tur do leh kan tu leh fa te rohlu kan hnutchhiah tur inzirtirna leh infuihna a ni a ti a. Sawrkar laipuiin nungcha te chenna leh anmahni humhalh nan dan Wildlife Protection Act, chu kum 1972-ah lo duang a, Mizoram-ah he dan hi kum 1974 ah hmang tanin hun rei tak kan lo hmang ve tawh a ni a ti a. Ramsa leh nungcha chhena venhim hi Wildlife Protection in a tum a ni a, Mizoram hi khawvel biodiversity hot spot 36 zinga pakhat niin, flora and fauna ah kan hausa hle a, chung venhim leh humhalh chu mitin mawhphurhna a ni a ti bawk a ni. Mizoram ah Protected Area 10 zingah National Park 2, Wildlife Sanctuary 7 leh Tiger Reserve 1 kan neih te hi an hlu em em a, heng area ah te hian danin a phal loh thil leh tih tura mipui min phut te tih hlawhtlin chu kan tih makmawh a ni a ti a. Khaw hrang hrang ah Community Forest Reserve kan nei bawk a, heng CFR te hi sava leh khuai thlenga an chenna (habitat) tha niin, hei hian kan ram chunga greenary percentage ti sangin leh ramngaw che reu tur a veng nasa hle a ni a ti a.

Minister chuan India ram khawpui chhunga ramngaw siam nana project- Nagal Van chu Municipal area ah chauh neih tura ruahman chu Mizoram sawrkarin Union Ministry-a a ngen angin Mizoramah Municipal pakhat chauh a awm avangin, Mizoram pumah a zau zawka hman a nih theihnan District 11-ah Nagar Van Project kalpui chu a remtih thu a sawi a, heihi India ram state danga la awm ngai lo a nih thu a sawi. School Nursery leh sahuan tihzauh leh tihchangtlungna turin sawrkar laipuiin a rawn angin proposal pawh siam mek a nih thu sawiin, Mizoram hi Burma, Bangladesh te nen ramri neiin ramsa tawlhruk chungchangah harsatna kan neih avangin sawrkar laipuiah Protection Squad pe turin ngenna a kal mek a, beiseina sang tak Department-in a neih thu a sawi bawk a. Tunhnaiah Ramsar List 5 zingah Pala, Siaha District telh a nih chu lawmawm a tih thu leh hei hian hmasawnna huang zau zawk a ken tur thu sawiin leh Tam Dil pawh Ramsar List-a telh tura hmalak mek a ni a ti bawk. Minister chuan kan leilung te dimdawi taka enkawl a, a hausakna te kan mamawh chin bak pela hmang lo a, nungcha leh mihringte hi chengza ho tur kan ni tih hriain, National Wildlife Week, 2022 chu hlawhtling taka hman a nih theih nan a hawng a ni.

National Wildlife Week, 2022 hawnnaah hian High School, College leh University zirlai zinga Wildlife Week denchhena Painting Competition buatsaiha lawmman dawngtu zirlai engemaw zat hnenah lawmman pek nghal an ni.

He hun hi PCCF Pu R.K Singh an a kaihruai a, lo kal te lawmin, keynote address pein, mihringte dam khaw chhuah nan nungchate humhalh a pawimawhzia a sawi a. National Wildlife Week thupui 'Climate Change and Wildlife Conservation' sawi zauna presentation chu Dr. C. Vanlalnghaka, Govt. Serchhip College hnen atanga ngaihthlak a ni a. 'Wildlife Scenario in Mizoram' chungchang presentation pawh Pu Laltlanhlua Zathang, DFO Aizawl hnen atangin ngaihthlak a ni bawk a ni. He hun hi Pi Lalrammmawii Sailo, Chief Wildlife Warden in lawmthu sawiin a khar a ni.

National Wildlife Week, 2022 hi October ni 2 atanga October ni 8 chhung a puan a ni a, vawiinah hian remchan zawkna avangin a hawnna hi neih a ni.