2160/2022-2023
Champhai, the 3rd October, 2022: District Disaster Management Authority (DDMA) Champhai kaltlanga State Disaster Response Fund (SDRF) for Covid-19 sum, Rs. 2,93,326 (cheng nuai hnih singkua sangthum zathum sawmhnih leh paruk) senga medical hmanraw hrang hrang leite chu vawiin chawhnu dar 12:30 khan District Bawrhsap, Pu James Lalrinchhana, Chairman, District Disaster Management Authority (DDMA) chuan District Hospital Champhaia hman turin a hlan.

Khuallian Pu James Lalrinchhana chuan Sawrkarin Covid-19 inkaihhruaina hlip rih mahse hriselna kawnga inkaihhruainate tha taka zawm chunga fimkhur chhunzawm zel a tul thu a sawi a. DDMA atanga hmanraw hlante chu Covid-19 atan chauh nilo, thil dang mamawhna zawn apianga hman theih tura duan, doctor-te ngaihpawimawh tak takte a nih thu a sawi a. Heng bakah hian Hospital mamawh leh tihpuitlin ngaite a tul anga bawhzui zel a ni, a ti a. District Hospital Champhai chu hospital pawimawh tak, Champhai District mai nilo ram dang atang pawha pantu nei reng a nih thu sawiin, thawktu Doctor leh Staff dang tha tak takte an awm chu thlamuanthlak a tih thu a sawi a. Damlo leh buaipui ngai chhawmdawl leh enkawl chu rawngbawlna pawimawh tak a nih thu leh hna zahawm tak a nih thu a sawi bawk.

District Bawrhsap chuan sawi chhunzawmin, hriselna, infiamna leh zirna-te chu hmalakna tur dangte zinga dah pawimawh hmasaka neih a nih thu a sawi a. Damlo leh mamawhtu tam takte pan leh awmna District Hospital Champhaia faina leh thianghlimna tha taka vawnnun a ni chu chhuanawm a ti a. Mi tam takte tlukluhna leh innghahna hmun a nih avangin thawktute chu rilru, taksa leh thlarau ti hrisel tur leh riru puitling tak pu turin a chah a. Mi ten taksa leh thlaraua damna an chan theih nana tan la turin a fuih a. An hmingthatna leh chin dan thate chu chhawmnung zel turin a ngen a. District Administration-in mamawh leh tul an neihte dap kawngah theihtawp a chhuahpui zel dawn thu a sawi bawk.

He hun Doctors' Lounge, District Hospital Champhaia hman hi Dr. Zatluanga, District Medical Superintendent chuan a kaihruai a. Dr. PC. Lalawmpuia, MD, HoD, Medicine Department-in DCHC report a pe a. Pu V.L Hruaimawia, District Organizer, DM&R, DC Office-in thu a sawi bawk a. Pi H. Vanlalhluni, Nursing Superintendent-in lawmthu sawiin hun a khar a ni.

District Hospital Champhai DCHC hi kum 2020 khan kalpui tan niin, khum 28 a awm a. Kum 2020 ah damlo admit 16 awmin nunna chan an awm lo a, nikum 2021 ah khan damlo admit 198 awmin nunna chan 14 an awm a, kum 2022 ah damlo 209 awmin nunna chan 9 an awm tawh a. Din a nih atanga tun thlengin damlo admit 423 leh nunna chan 23 an awm tawh a ni.

Vawiina hmanraw inhlante hi Cardiac Monitor Multi Para (BPL), Pulse Oxymeter, Omron Smart BP Monitor, HEINE BP Apparatus, Direct Lanryngoscope, Ambu Bag, Vein Finder leh medical hmanraw pawimawh dangte a ni a. Covid-19 mai bakah mamawhna zawn apianga hman tur a ni.