2161/2022-2023

Kolasib dated 3rd October 2022: Vawiin chawhma khan Pu K.Lalrinliana, Minister of State, Food, Civil Supplies & Consumer Affairs Department, Kolasib Assembly Constituency bialtu MLA ni bawk chuan Assam lamin Zophaia chawlhbuk saa hmalakna an kalpui chungchangah Panchayat Bhavan, Bairabi North-ah Bairabi Joint VC chairman kaihhruaina hnuaiah tlawmngai pawl hrang hrangte nen thutkhawmna a neihpui a. Pu John LT Sanga, Deputy Commissioner, Pu Vanlalfaka Ralte, Superintendent of Police, Pi Margaret Lalramchhani, Divisional Forest Officer, Pu Vanlalmuana, SDC (Bairabi), Pu Hmingthanzuala, DIPRO leh DFO, Kolasib hnuaia Range Officer-te he hunah hian an tel bawk a ni.

Minister Pu K.Lalrinliana chuan ramri buaina avanga Mizo thalaiten Assam Police kut an tawrh a remtih loh thu sawiin state pahnih inrinna hmunahte chuan hmalakna kalpui lo tura inremsiam a nih angin Zophaia Assam lam hmalakna chungchangah rang takin State pahnih te Chief Minister leh Home Minister-te an inbiak nghal thu a sawi a. Thutkhawmna neihlai mek hian Assam lam chuan an chawlhbuk sak chu an rawn thiat nghal a ni. Pu K.Lalrinliana chuan Zophaia Mizoram Police Duty-na hmun chu awmhmun rem tak a nih loh avangin chan chhe zawk chang thei kan nih thu a sawi a, hemi avang hian fimkhur taka ngaihtuahna sen a tul thin thu a sawi. Ram chin hauha Bairabi khawtlangin theihtawp an chhuah thinnaah leh sawrkar ngenna ngaipawimawha ramri chungchanga thawhhona tha tak a awm thin avangin lawmthu a sawi a. Ramria buaina chinfel a nih theih nan Border Committee kaltlangin hmalak mek zel a nih thu a sawi bawk a ni.

Pu John LT Sanga, Deputy Commissioner pawhin he hunah hian thu sawiin Status Quo kenkawh zel a nih theih nan DC leh SP an inbiak reng thu a sawi a, Zophaia chawlhbuk sak a ni tih hriat a nih veleh DC, Hailakandi hnenah hna chawlhsan tura lehkha thawn a nih bawk thu a sawi. SP, Kolasib leh DFO, Kolasib atangte pawhin ramria hmalak dan tur ngaihthlak a ni.

Vawiin thutkhawmnaah hian ramri chungchanga thu thehdarh fimkhur a tul thu leh thuneitute hnena thlen phawt a pawimawh thu sawi a ni a. Pawl hrang hrang kal fawr bik awm lova inlungrual taka sawrkar thu ngaichang chunga thawhho a pawimawh thu te, Police duty dah belh a tul thu te sawi a ni.