Vawiin khan Health Department buatsaihin Synod Conference Centre-ah Food Safety Awareness Drive neih a ni a. Health Minister Pu Lal Thanzara’n he hun hi a hmanpui.

Pu Lal Thanzara chuan mipuiten ei leh in thianghlim leh hrisel zawk kan neih theh nan hmalak mek a ni a, Food Safety and Standards Act, 2006 in inkaihhruaina dan a siamte chu mihring eitur siam leh zuar thin ten an zawm tur a ni, a ti. Mi hip nan leh an thil zawrh tih itawm nan leh tih tuihnai nana thil pawlhte hi mihring tana himlo a awm thin avangin fimkhur a ngai a, ei leh in thianghlim leh hrisel kan neih theih nan Food Safety and Standards Act in a phut angin ei siama zuar duhte chuan registration emaw license emaw an neih a tul tawh dawn a ni, a ti a. Khawchhak ram ri a awm kan nih avangin mit la leh tui tak tak ei leh in tur tam tak a lo chhuk a, hengte hi mihring ei atan a him em tih ngaihtuah a ngai a, fimkhur a ngai a ni, Health Minister chuan a ti.

Health & Family Welfare Department hian hun engngemaw chen atang khan ei leh in thianghlim, him leh hrisel mipuiten kan ei theih nan hma a lo la thin a, inkaihhruaina dan tha leh changtlung tak Food Safety and Standards Act, 2006, Rules & Regulations, 2011 chu India ram chhungah hman mek a ni. He dan kengkawhtu Health & Family Welfare Department hian mipui ei leh in tur siamchhuah leh zawrh lama sumdawngten dan an zawm leh zawm loh te, hriat loh inhrilfiah hna te a thawk a ni.

Kum 2015 atanga 2016 November thleng khan mihring eia him leh himlo endik turin food sample 36 an thawn tawh a, heng sample zinga pali hi a thalo tih hmuhchhuah a ni. Khapna thupek tihchhuah niin Lion Energy Drink, Aisen, Paul’s squash leh Kame Meat masala te chu zawrh khap a ni. Thlai hi chi 7 endik tawh a ni a, a thalo hmuhchhuah a awm lo. Thla tinin Supply Department buhfai endik tura thawn thin a ni bawk a, tun thlengin him lo hmuhchhuah tur a la awm lo.

FSS Act, 2006 chuan ei leh in lama sumdawngte chu License emaw Registration emaw nei ngei ngei tura a tih angin hma lak chhoh mek a ni a, 19th November 2014 atanga 14th December, 2016 thlengakhan license 316 pek chhuah a ni a, Registration Certificate 1089 pekchhuah a ni tawh bawk.

Food Safety Awareness Drive hi nilenga neih niin college, school leh office hrang hrang canteen neite kohkhawm an ni. Commissioner of Food Safety Dr.K.Ropari, Health Principal Director ni bawk chuan programme a kaihruai a. Dy.Commissioner of Food Safety Pu Lalsawma chuan an hmalak dan report pe in chawhnu lamah Food Safety Officer-ten FSS Act chungchang leh thil pawimawh dang inzirtirna hun an hmang a ni.